Օրերս Հայաստանի ազգային պատկերասրահում բացվեց «Գալանտ դար» խորագրով 18-րդ դարի ֆրանսիական փորագրանկարչության ցուցահանդեսը: Ներկայացված էր 45 աշխատանք՝ հատիչային փորագրանկարներ, օֆորտներ, մատիտային տեխնիկայով արված փորագրանկարներ: Վերջիններս մուտք են գործել թանգարան 1926, 1930-40-ական թվականներին Սանկտ Պետերբուրգի պետական թանգարանային ֆոնդից, Պետական Էրմիտաժից, Պուշկինի անվան Գեղարվեստի պետական թանգարանից, ինչպես նաեւ նվիրատվությունների ու մասնավոր անձանցից ձեռք բերված աշխատանքներից:
Ցուցադրված 45 գործերը ծանոթացնում են ռոկոկո ոճի արվեստին: Ինչ վերաբերում է գալանտ ոճին, ապա այն մարմնավորվել է Անտուան Վատտոյի, Ֆրանսուա Բուշեի, Ժան-Օգյուստ Ֆրագոնարի, Կարլ Վան Լոոյի գեղանկարներում, որոնք էլ հաճախ էին վերարտադրում փորագրանկարիչները: Ցուցադրված են նաեւ դարաշրջանի հանրաճանաչ վարպետների բնօրինակների վերատպությունները, ռոկոկո ոճի նկարիչների սիրված հովվերգական տեսարաններ, դիցաբանական թեմաներով թերթեր, հռչակավոր դիմանկարիչներ Հ. Ռիգոյի եւ Ն. Լարժիլիերի գործերից արված փորագրանկարներ, գրքային գրաֆիկա եւ այլն:
Պատկերասրահից տեղեկացանք, որ այցելուները դեռ երկու ամիս հնարավորություն կունենան վայելել ֆրանսիական փորագրանկարչության ցուցահանդեսը:
ԵՎԱ ՀԱԿՈԲՅԱՆ
«Առավոտ» օրաթերթ
02.03.2015
