ՀՀ նախագահի աշխատակազմի ղեկավար Վիգեն Սարգսյանը այսօր «Հայկական պետականության կերտման մարտահրավերները» թեմայով քննարկման ժամանակ ներկայացրել է Հայաստանի հիմնական մարտահրավերները:
«Ինձ համար կողմնորոշիչ թիվ կա տնտեսական առաջընթացի, այն է, որ Հայաստանի քաղաքացիներից ամեն 40-րդը ծառայում է ԶՈւ տարբեր տեսակներում: Սա նշանակում է՝ ամեն 40-րդը, իսկ դրանք մարդիկ են, որոնք տնտեսությունը պետք է առաջ տանեն, տնտեսության, բյուջեի հաշվին ստանում են զենք, հանդերձանք, վառելիք, սնունդ: Այսինքն, տնտեսության վրա հսկայական լրացուցիչ հանգամանք կա, չեմ ուզում բեռ անվանել: Հաջորդը՝ պատմական հիշողության եւ չլուծված ազգային կարեւորագույն խնդրի հարցն է: Ապրիլի 24-ին ընդառաջ հաճախ է խոսվում, թե արդյոք ցեղասպանության խոսքը այդքան առանցքային է մեր առաջընթացի գոյության համար, թե տուրք ենք տալիս խորհրդանշական բաների՝ կողքի դնելով իրական օրակարգը: Մեր պետականության կառուցման կարեւորագույն մարտահրավերներից է այդ խոսքի, ցեղասպանության պատմության չլուծվածությունը: Դա ոչ միայն պատմական արդարության հարց է, այլ այսօր այսօրվա ազգային անվտանգության խնդիր է: Ցեղասպանությունը ոչ միայն չի ճանաչվել Թուրքիայի կողմից, այլ այն այսօր էլ ժխտվում ես: Ցեղասպանության ճանաչման պայքարը քաղաքական արդի օրակարգի, ազգային անվտանգության խնդիր է»,- ասաց Վիգեն Սարգսյանը:
Արփինե ՍԻՄՈՆՅԱՆ
