Մեկնաբանելով ՀՀ կառավարության այն որոշումը, ըստ որի Երեւանի Գևորգ Էմինի անվան թիվ 182 ավագ դպրոցը պետական ոչ առևտրային կազմակերպությունից վերածվել է հիմնադրամի՝ անցնելով Մայր Աթոռ Սուրբ Էջմիածնի ենթակայության տակ, Հայաստանի Հելսինկյան կոմիտեի նախագահ իրավապաշտպան Ավետիք Իշխանյանը Aravot.am-ի հետ զրույցում տարակուսանք հայտնեց: «Ուղղակի զարմանում եմ, որ փոխանակ առաջընթաց գրանցելու՝ Հայաստանը կարծես թե մեծ քայլերով հետ է գնում դեպի խորը միջնադար:
Խորը միջնադարը դա կղերականության իշխանությունն էր հասարակության վրա, որը թույլ չէր տալիս զարգանալու, որովհետեւ եկեղեցական դոգմաներով էին առաջնորդվում: Այսօր կարծես թե Հայաստանի իշխանությունները կամովին, գուցե դաշնակցելով եկեղեցու հետ՝ հայ ժողովրդին տանում են դեպի խավար, որովհետեւ 21-րդ դարում պետությունը դպրոցը հանձնի եկեղեցուն՝ դաստիարակության համար, դա չլսված բան է: Պատկերացրեք երեխաներն այդտեղ ինչ պետք է սովորեն՝ պետք սովորեն Աստվածաշնչյան դոգմաներ եւ ոչ թե գիտություն, ու մենք ստանալու ենք շրջանավարտներ, որոնք լինելու են տգետ ֆանատիկներ: Ես ուղղակի զարմանում եմ՝ արդյոք նպատակն ա՞յն է, որ տգետներով հեշտ է իշխանություն պահելը: Այլ պատասխաններ չկան: Զարմանում եմ միջնադարյան մտածողության վրա, եթե եկեղեցին ցանկանում է դպրոց ունենալ, դա օրենքով թույլատրված է, ցանկացած եկեղեցի, այդ թվում Հայ առաքելականը, կարող է իր դպրոցը իր հաշվին պահել, բայց պետությունը չպետք է աջակցի ու իր դպրոցները նվիրի եկեղեցուն»,-ասաց Ավետիք Իշխանյանը:
Հավելենք, որ ՀՀ ԿԳ նախարարը 182 ավագ դպրոց այցելության ժամանակ նշել էր, որ դպրոցը Մայթ Աթոռի ենթակայությամբ դառնալու է հումանիտար ուղղվածությամբ նախամասնագիտական ավագ դպրոց, նաեւ հավելել, թե հարցը քննարկվել է Վեհափառ հայրապետի հետ, որը պատրաստ է քայլեր ձեռնարկել՝ դպրոցն ավելի մրցունակ և արդիական դարձնելու ուղղությամբ:
Գոհար ՀԱԿՈԲՅԱՆ
