Այս տարի Զատիկին էական թանկացումներ չեն լինի։ Այս մասին «Հենարան» ակումբում վստահեցրեց սոցիոլոգ Ահարոն Ադիբեկյանը։ Ձվի շուկան պետության հսկողության տակ է, գնի բարձրացում չի լինի, բրինձը որոշ տեղերում վաճառվում է ինքնարժեքով։
Ինչ վերաբերում է ձկնամթերքի շուկայում գներին, ապա այնտեղ նույնպես թանկացումներ չեն լինի. «Ռուսաստան արտահանվող ձկների քանակը նվազել է եւ այս հանգամանքով պայմանավորված՝ ձկնամթերքի գներն էլ չեն բարձրանա, քանի որ մրցակցությունը մեծացել է»։
Սոցիոլոգը վստահեցնում է, որ Զատիկի սեղանի համար հայկական ընտանիքներին միջինն անհրաժեշտ է ընդամենը տասը հազար դրամ. «Այս տարի եթե սեղանին մրգեղեն չլինի, լինի չամիչով փլավ, ներկած ձու եւ մի շիշ գինի, ապա բավականին համեստ զատիկ ենք նշելու։ Դա կապված է բնակչության գնողունակության անկման հետ, այլ ապրանքների բարձր գների հետ,ինչպես նաեւ Հայաստանի ԵՏՄ տարածքում անկայուն դիրքի հետ»։
Սպառողների միության նախագահ Արմեն Պողոսյանն էլ ասուլիսին վստահեցրեց, որ այս տարի ձվի գների բարձրացումներ չեն լինի, քանի որ ձու արտադրողների միությունը հայտարարել է, որ երեք դրամով պակաս են մատակարարում խանութներին։
Կարդացեք նաև
Պրն Պողոսյանը նաեւ վստահեցրեց, որ այս տարի շուկայում ներկրված ձու ընդհանրապես չի վաճառվում. «Եթե կարող ենք տեղում զարգացնել արտադրությունը, ինչո՞ւ պիտի ներկրենք,ներկրում են միայն ծայրահեղ դեպքերում»։
Էլյա ՀՈՎՀԱՆՆԻՍՅԱՆ
