Կառավարության աշխատակազմի ղեկավար Դավիթ Հարությունյանն այսօր կառավարության նիստում հայտնեց, որ ապրիլի 6-ի փոխարեն կաշխատեն ապրիլի 11-ին: Միաժամանակ պարոն Հարությունյանն ասաց, որ տնտեսական ոլորտի, մասնավորապես՝ մասնավոր ընկերություններ դժգոհություններ են ներկայացրել, որ մեր երկրում ոչ աշխատանքային օրերը շատ են, ինչը վնասում է նրանց բիզնեսին: «Տնտեսական այս պայմաններում նրանք ասում են, որ վնասներ են կրում»,-ասաց պարոն Հարությունյանը:
Նիստը վարող վարչապետ Հովիկ Աբրահամյանն էլ հավելեց՝ քանի որ հունվարից անդամակցում ենք Եվրասիական տնտեսական միությանը, իսկ նրանք շաբաթ-կիրակի չեն աշխատում, երկուշաբթի են աշխատում, իսկ մենք չենք աշխատում, այս դեպքում էլ տնտեսական վնասներ կունենանք:
Հովիկ Աբրահամյանը ամբիոնի մոտ հրավիրեց հոգեւորական՝ Արշակ սրբազանին, որպեսզի լսի Եկեղեցու տեսակետը:
«Ողջերի հետ առնչվող հարցերը սպառեցինք, հիմա ննջեցյալների հարցերին ձեռնամուխ կլինենք»,-ասաց Արշակ սրբազանը: Նրա խոսքերով. «Ննջեցյալները նույնքան ողջ են որքան կենդանի մարդիկ: 2008 -ից, կառավարությունը հիմնվելով խղճի ազատության օրենքի վրա, տաղավար տոներին հաջորդող օրերը սահմանել է մեռելոց, մարդկանց հնարավորություն տալով այցելել ննջեցյալների շիրիմներին, մինչեւ այսօր անխափան կերպով գործել է: Չեմ անդրադառնում այն առարկություններին որոնք գոյություն ունեն: Այլ երկրների համեմատ մեր երկրի տոնացույցը ծանրաբեռնված է ոչ աշխատանքային օրերով, բայց պետք է դրանք չլինեն ննջեցյալների հաշվին»:
Կարդացեք նաև
Հոգեւորականը պատմական անցում կատարեց եւ օրինակ բերեց, որ, անգամ թուրքական բանակում ծառայող քրիստոնյա զինվորներին հնարավորություն է ընձեռվել երեք օր ազատել ծառայությունից:
Նա օրինակ բերեց նաեւ Երեւանի խանին, որը բացառություն է արել եկեղեցական տոներին: Արշակ սրբազանը չբացառեց, որ մեռելոցների դեմ հասարակության որոշ շրջանակների կողմից հրահրվող արշավ է սկսվել: Նրա խոսքերով, վերջին մարդահամարի տվյալներով, մեր բնակչության 96 տոկոսը հայտնել է, որ Հայ առաքելական եկեղեցու հետեւորդներ են, ուստի սրբազանի կարծիքով հենց նրանց կարծիքը պետք է հարցնել:
Ի պատասխան վարչապետն ասաց, որ եթե նույնիսկ աշխատանքային օր լինի մեռելոցը, ապա ոչ մի պաշտոնյա խոչընդոտ չի հանդիսանա, որ ննջեցյալ ունեցող աշխատակիցը գնա գերեզման:
Հովիկ Աբրահամյանն ասաց, որ իրեն դիմել են նաեւ Այ-Թի ոլորտի աշխատակիցները, որպեսզի մեռելոցներին լինեն աշխատանքային օրեր:
Վարչապետն ասաց, որ հարցը կքննարկեն եւ որից հետո միայն որոշում կկայացնեն:
Լուսինե ԲՈՒԴԱՂՅԱՆ
