«Այբ» կրթական հիմնադրամում ապրիլի 1-ին կրթական հիմնադրամը եւ Ինֆորմացիոն տեխնոլոգիաների ձեռնարկությունների միությունը կազմակերպել էին հայկական եւ ռուսական տեխնոլոգիական ընկերությունների հանդիպում: Հանդիպմանը ներկա էին ռուսական հարյուր ընկերությունների ներկայացուցիչներ, այդ թվում՝ Yandex, 1C, Samsung, Dell, Acer, IBM, Siemens:
Ինֆորմացիոն տեխնոլոգիաների ձեռնարկությունների միության ղեկավար Կարեն Վարդանյանը Aravot.am-ի հետ զրույցում ասաց, որ հանդիպումը շատ լավ առիթ է, որպեսզի իրենց ռուս գործընկերներին ծանոթացնեն հայկական իրականության հետ: Նա հանդիպումը կարեւորում է նաեւ ոլորտի զարգացման տեսանկյունից. «Ես կարծում եմ՝ մարդկային կոնտակտները այն հիմնաքարն է, որի հիման վրա հետագայում հնարավոր է նաեւ խոսել բիզնես կոնտակտների մասին: Ոլորտի զարգացումը նշանակում է այլ շուկաներում մարդկային կապերի ստեղծում, ինչն էլ մենք անում ենք»:
IBM ընկերության ներկայացուցիչ Անդրեյ Ֆիլատովը լրագրողների հետ զրույցի ընթացքում ասաց, որ իրենց կազմակերպությունը Հայաստանում գործընկերներ ունի եւ ծանոթ է հայկական ՏՏ ոլորտի հետ. «Այս հանդիպումը նախ եւ առաջ հնարավորություն է Հայաստանի շուկայում նոր տեխնոլոգիաներ ներկայացնելու համար, այսպես ասած՝ հնարավորություն է զարգացնել բիզնեսը ի օգուտ տնտեսության»:
Նախագահի աշխատակազմի ղեկավար Վիգեն Սարգսյանը իր ողջույնի խոսքում հայտարարեց, որ Հայաստանը մեծ ուշադրություն է դարձնում տեղեկատվական տեխնոլոգիաների վրա եւ Հայաստանում այդ ոլորտը մեծ տեմպերով է զարգանում:
Կարդացեք նաև
«Մենք մեր տեխնիկական ֆակուլտետներում մեծ մրցույթների ենք ականատես լինում: Մենք հպարտ ենք, որ այս ոլորտում երիտասարդները պահանջված են: Հայաստանում գործող համալսարաններն ունեն IT մասնագետների համար նախատեսված մրցակցային ծրագրեր: Մենք բիզնեսի եւ ուսումնական հաստատությունների միջեւ սերտ կապ ենք տեսնում: Շատ կազմակերպություններ համագործակցում են բուհերի հետ, այնտեղ բացում իրենց կենտրոնները, որոնք օգնում են նրանց կադրերին պատրաստել իրենց պրոֆիլով»,-ասաց նա:
Ամի ՉԻՉԱԿՅԱՆ
