«Չինաստանը հետաքրքրության շրջանակի մեջ է մտնում, մեծ քաղաքական խաղերի մեջ է: Եթե հաշվարկները ճիշտ լինեն, 2050 թվականին իր պարամետրերով կդառնա աշխարհի ամենամեծ պետությունը: Գերտերությունների մեջ կլինի առաջին շարքում: Բնականաբար, նա հիմա ունի աշխարհագրական իր ուղղվածությունը նաեւ Անդրկովկասի ուղղությամբ»,- այսօր «Հայելի» ակումբում այսպիսի կարծիք հայտնեց արտակարգ եւ լիազոր դեսպան Արման Նավասարդյանը:
Ինչ վերաբերում է Հայաստան-Չինաստան համագործակցությանը՝ ըստ նրա, ուրախալի է, որ շոշափվել է Մետաքսի ճանապարհի հարցը. «Սրանից դար առաջ է խոսվել այդ մասին, գոյություն է ունեցել այդ ճանապարհը եւ դրա վերականգնումը, չգիտեմ որքան է հնարավոր, բայց դա կարող է հոյակապ ճանապարհ լինել Հայաստանի համար»:
Ըստ Արման Նավասարդյանի, եթե Մետաքսի ճանապարհը եղավ, մեր եւ Ադրբեջանի ճանապարհը ո՞նց է անցնելու, Թուրքիան էլ կուզի մասնակցել. «Սրանք հարցեր են: Եվ մեր դժբախտությունն է եւ մեր բախտավորությունն է: Դժբախտ ենք, որ այսպիսի հարեւաններ ունենք: Բախտավոր ենք, որ խաչմերուկում ենք: Չինաստանը եթե շահագրգռված է ՀՀ-ի հետ ունենալ այնպիսի հարաբերություններ, որ համընկնում է նրա աշխարհաքաղաքական ծրագրերին: Համագործակցությունը կախված է երկու կողմից, մի կողմով համագործակցություն չի լինում: Երբ ստորագրվում է միջպետական համաձայնագրեր, դրանց կատարելության տոկոսը հարցականի տակ է դրվում: Եթե 25 տոկոսը կատարվեց միջպետական համաձայնագրերի, շատ լավ է»:
Հռիփսիմե ՋԵԲԵՋՅԱՆ
