Մոսկվայում անցկացված սամբոյի «Խառլամպիեւի գավաթ» Աշխարհի գավաթի խաղարկության վերջում հայաստանցի մարզիկ Աշոտ Դանիելյանի առաջին հորիզոնական զբաղեցնելու պատվին հնչեց Հայաստանի օրհներգը, որի ընթացքում ադրբեջանցի սամբիստ Բախտիյար Աբասովը ցուցադրաբար կքանստեց:
Aravot.am-ին հասած տեղեկություններով, պատվանդանից իջնելուց հետո նա կուլիսներում մոտեցել է արցախցի Աշոտ Դանիելյանին եւ ներողություն է խնդրել իր արարքի համար՝ բացատրելով, որ եթե Հայաստանի օրհներգը կանգնած լսեր, իր երկրում կարող էր խնդիրներ ունենալ:
Sovsport.ru-ի փոխանցմամբ՝ ավելի ուշ Աբասովը հայտարարել է, որ չէր կարող Հայաստանի օրհներգը կանգնած լսեր. «Ես դիտմամբ եմ նստել: Այդ բնավորությունը իմ արյան մեջ է: Եթե այդպիսի դեպք կրկնվի, ես նորից չեմ կանգնի: Ես շատ մրցույթների եմ մասնակցել եւ միշտ լսել եմ Հայաստանի հիմնը: Բայց ես չեմ կարող կանգնած լսել Հայաստանի օրհներգը»:
Ադրբեջանցի մարզիկը նաեւ ասել է, որ եթե ադրբեջանցիներից որեւէ մեկն այդպիսի իրավիճակում կանգնած մնար, նա չէր կարող ադրբեջանցի համարվել. «Սա իմ անձնական կարծիքն է: Այո, ես վատ էի զգում, երբ Հայաստանի օրհներգն էր հնչում: Ես ցավ չունեի, բողոք չունեի: Ես ուղղակի նստեցի, երբ սկսեց հնչել օրհներգը, որն ինձ հետ որեւէ կապ չունի: Կարող է ինչ-որ մեկը մոռացած լինի, բայց ես երբեք չեմ մոռանա Խոջալուի ողբերգությունը եւ այլ դեպքերը: Այդ պատճառով ես չեմ ընդունում այդ օրհներգը»,- ասել է Աբասովը:
Կարդացեք նաև
Հայաստանի սամբոյի ֆեդերացիայի նախագահ Լեւոն Հայրապետյանը Aravot.am-ի հետ զրույցում ասել էր, որ «մարզադահլիճի՝ սամբոյի միջազգային կազմակերպությունների ղեկավարների, մասնակից երկրների պաշտոնյաների օթյակում, որտեղ գտնվում էինք, միջադեպից հետո ինձ մոտեցավ Ադրբեջանի փոխդեսպան Գուդզի Օսմանովը, բոլոր ներկաների առջեւ հրապարակավ ներողություն խնդրեց ինձանից՝ խոստանալով, որ ինքը համապատասխան աշխատանքներ կտանի այդ մարզիկի հետ»:
Սակայն այսօր հրապարակած հոդվածում ադրբեջանական Haqqin.az կայքը գրել է, որ Գուդզի Օսմանովը լրագրողներին ասել է, թե չի տեսել մարզիկների մրցանակները, քանի որ մինչ այդ դուրս է եկել դահլիճից: Նա նաեւ հավելել է, որ ոչ ոքից ներողություն չի խնդրել:
Պատրաստեց Աշոտ ԻՍՐԱԵԼՅԱՆԸ
Կուլիսների հետևում, օթյակներում, մտքում, ադեալի տակ ներողություն խնդրելը հաշիվ չի: Օրենք-մորենք չկա, որ մեր ֆեդերացիան պաշտոնական բողոք ուղարկի մարզիկին ոչ վայել արարքից բողոքելով: թե չե նման սրտաճմլիկ պատմություններ պատմելով “ներողությունների” մասին, մեր ֆեդերացիան և պատվիրակությնը ոնց որ թե իր անգործությունը (եթե այդպիսին կա) փորձի տաքցնել: իսկ եթե օֆիցիալ բողոք գրելու են ու հասնեն, որ նման վարքագիծը դատապարտվի կազմակերպիչների և միջազգային կազմակերպությունների կողմից, ուրեմն այս բոլոր “հեքիաթները” ներողությունների մասին ավելորդ են: