Համաշխարհային բանկը վերանայել է Հայաստանի 2015 թվականի տնտեսական աճի կանխատեսումները: Այսօր ՀԲ-ի հայաստանյան գրասենյակի տնօրեն Լորա Բեյլին լրագրողների հետ հանդիպման ժամանակ ասաց. «Կարծում ենք, որ Հայաստանի տնտեսական աճը շատ, շատ, շատ քիչ կլինի: Հնարավոր է՝ դրական միտումով` 0,8%»:
Տիկին Բեյլի խոսքերով` այդ 0.8% դրական միտումն էլ կարող է բացասական դառնալ, եթե լուրջ ցնցումներ տեղի ունենան. «Այդ ցնցումները կարող են լինել հիմնական առեւտրային գործընկերների՝ Ռուսաստանի եւ Եվրոպայի ընդհանուր տնտեսական վիճակի վատթարացման արդյունքում, բայց դա կարող է կապված լինել տարադրամի փոխանակման կուրսի կտրուկ տատանման արդյունքում»:
ՀԲ-ի հայաստանյան գրասենյակի ղեկավարը նշեց, որ Հայաստանի տնտեսական աճի վրա ազդում են միջազգային շուկայում պղնձի գները, որոնք կարող են անկայուն մնալ` մի քիչ իջնել, մի քիչ` բարձրանալ. «Բայց մենք գտնում ենք, որ ամենամեծ ազդեցությունը կունենա տարածաշրջանային տնտեսությունը, եւ հատկապես Ռուսաստանի տնտեսության անկումը»:
Նելլի ԲԱԲԱՅԱՆ
