Արդարադատության նախարարությունը կամ հետին թվով փաստաթուղթ է ներկայացրել, կամ, ըստ Դավիթ Խաժակյանի, օրենքը ԱԺ-ում արդեն քվեարկվել է առանց արդարադատության նախարարության որոշման
Սահմանադրական դատարանը (ՍԴ) վաղը` մարտի 31-ին նշանակված «Կուտակային կենսաթոշակների մասին» օրենքի վերաբերյալ դատական նիստը հետաձգել է մինչեւ հուլիսի 7-ը։ Այս որոշմամբ բավարարվել է Սահմանադրական դատարան դիմած Ազգային ժողովի պատգամավորների ներկայացուցիչ Արծվիկ Մինասյանի ներկայացրած դիմումը. հետաձգման հիմնավորման մեջ ասված է, որ նոր ստացված մեծածավալ փաստաթղթերի վերաբերյալ ամբողջական մոտեցումները ներկայացնելու համար ժամանակ է անհրաժեշտ ։
Նշենք, որ սա օրենքի փոփոխություններից հետո առաջին դատական նիստը պետք է լիներ. այդ փոփոխությունները Ազգային Ժողովի որոշ պատգամավորներ գտնում են եւս հակասահմանադրական:
«Ցավով պետք է նշեմ, որ Ազգային Ժողովը`որպես պատասխանող կողմ, այսինքն` օրենքն առաջարկող անձինք անգործություն են ցուցաբերել»,- Aravot.am-ի հետ զրույցում նիստի հետաձգման մասին ասաց կուտակային կենսաթոշակային բարեփոխումների դեմ պայքարող «ԴԵՄ ԵՄ» խմբի անդամ Դավիթ Խաժակյանը: Նրա փոխանցմամբ` ՍԴ-ին օրենքը ներկայացնող կողմը շատ ուշ է ուղարկել պատասխանը. «Մասնավորապես ԱԺ-ն ու արդարադատության նախարարությունը, երբ հայցը ներկայացվել է, այդ դիմումն ուղարկվել է բոլոր կողմերին, որոնք պարտավոր էին պատասխանել հայցադիմումում ներկայացված ձեւակերպումներին: Արդարադատության նախարարությունն ու ԱԺ-ն դա արել են նշանակված դատական նիստից ընդամենը մի քանի օր առաջ, ինչը հնարավորություն չէր ընձեռում պատգամավորներին հայցը ներկայացնող կողմին համակողմանի դիտարկելու այս ամենը»:
Կարդացեք նաև
Դավիթ Խաժակյանի ներկայացմամբ` արդարադատության նախարարության ներկայացրած փաստաթղթի ժամկետն ակնհայտ ցույց է տալիս, որ օրենքը պատշաճ կերպով չի անցել ընթացակարգը. «Այսինքն` սա խոսում է այն մասին, որ օրենքը ԱԺ-ում արդեն քվեարկվել է առանց արդարադատության նախարարության որոշման, կամ խոսում է այն մասին, որ նախարարությունն ուղղակի մեզ ներկայացրել է հետին թվով փաստաթուղթ, ինչը հակաիրավական է: Այս ամենը կարիք ուներ վերլուծության եւ ներկայացվեր ՍԴ»:
«ԴԵՄ ԵՄ»-ի անդամը նաեւ նկատեց, որ ՍԴ-ում նախատեսված է գործի քննության գրավոր ընթացակարգ, եղել է միջնորդություն, որպեսզի ՍԴ-ն այն բանավոր ընթացակարգով քննի, սակայն պատասխան այս առնչությամբ չի եղել: «Շատ կարեւոր է, որ բանավոր դատաքննություն լինի, որովհետեւ, եթե գրավոր լինի, հնարավոր է բազմաթիվ խնդիրներ այդպես էլ չվերհանվեն: Գրավոր նշանակում է փաստաթղթերի փոխանակում: Պատկերացրեք `կողմը ներկայացնում է մի շարք հարցեր, իսկ կառավարությունն անդրադառնում է ընդամենը մի քանիսին, եւ այդպես էլ ավարտվում է: Մենք հիշում ենք, որ նախորդ դատաքննության ժամանակ շատ ակնառու էին կողմի փաստարկները եւ օրենքը պաշտպանող կողմի ուղղակի մերկապարանոց հայտարարությունները: Այսինքն` բանավորի դեպքում հանրությունն էլ տեսնում է գործընթացը, եւ դա ՍԴ-ի համար լրացուցիչ զսպաշապիկ է առավել պատշաճ որոշում կայացնելու առումով»:
Հիշեցնենք, որ ԱԺ մի խումբ պատգամավորներ դիմել են ՍԴ, օրենքի փոփոխություններից հետո, եւ պնդում են, որ այն հակասահմանադրական մի շարք կետեր ունի: Մասնավորապես, ինչպես հիշեցրեց Դավիթ Խաժակյանը, մի քանի հակասահմանադրական կետեր պահպանվել են դեռ նախորդից եւ եւս մի քանի հակաասահմանադրական կետեր ավելացվել են փոփոխությունների ընթացքում: Նախ` խտրականությունն ըստ սոցիալական կարգավիճակի, այսինքն` պետական ոլորտի աշխատողները պարտադիր վճարում են կուտակային կենսաթոշակային ֆոնդին, իսկ մասնավորը` ոչ: Ինչպես նաեւ պահպանվել է տարիքային խտրականությունը: «Բացի այս, օրենքն Ազգային Ժողովում ընդունվել է մի շարք խախտումներով, որոնք համաձայն ՀՀ Սահմանադրության, պետք է անվավեր ճանաչվեր, քան որ օրենքը չի անցել անհրաժեշտ ընթացակարգը` սկսած մարդու իրավունքների պաշտպանի գնահատականից, հանրային լսումներն ու այլ բազմաթիվ խախտումներ են արձանագրվել: Այս ամբողջը որպես մեկ փաթեթ վիճարկվում է Սահմանադրական դատարանում»:
Նելլի ԲԱԲԱՅԱՆ
