Մեկնաբանում են Հայաստանի քաղաքական ուժերը (կատակ)
ՀՀԿ. Դա Հայաստանի իշխանության՝ բարեփոխումներին ուղղված 7 տարվա քաղաքականության ուղղակի հետեւանքն է, ինչպես նաեւ՝ ՀՀԿ առաջնորդ Սերժ Սարգսյանի՝ Բրյուսել եւ Չինաստան կատարած վերջին այցերի շոշափելի արդյունքը: Սահմանադրական փոփոխություններից հետո «Բարսելոնան» «Ռեալին» կհաղթի ավելի խոշոր հաշվով:
ԲՀԿ. Քանի Հայաստանի բնակչության 40 տոկոսն աղքատ է, իսկ 10 տոկոսը՝ ծայրահեղ աղքատ, քանի արտագաղթը հասել է ողբերգական մասշտաբների, քանի հայ աշխատավորը, հայ ռանչպարը չի կարող իր աշխատանքով ընտանիք պահել, այլ արդյունքի սպասելն անիմաստ է:
ՕԵԿ. «Օրինաց երկիրը» եւ նրա առաջնորդ Արթուր Բաղդասարյանը մշտապես ապացուցել են, որ հետեւողական են ժողովրդի մատից փուշ հանելու իրենց քաղաքականության մեջ: Վկա՝ 6421 օրինագիծը, որոնք հեղինակել է մեր կուսակցությունը: Մասնավորապես, «Բարսելոնայի» հաղթանակը բացատրվում է ՕԵԿ-ի՝ մեծ ջանքերի շնորհիվ ընդունված երրորդ երեխայի նպաստի մասին օրենքի շնորհիվ:
Կարդացեք նաև
ՀԱԿ. Իրականում խաղը պետք է ավարտվեր 10-0՝ հօգուտ «Ռեալի»: Սակայն վերջին պահին հանցավոր ռեժիմը, զգալով իր մոտալուտ վախճանը, ահաբեկչական գործողություններ իրականացրեց եւ ստիպեց Կասիլյասին երկու գնդակ բաց թողնել: Դա մի քանի ամսով հետաձգել է ռեժիմի հոգեվարքը, որը սակայն անխուսափելի է:
ՀՅԴ. «Ռեալի» պարտության հիմնական պատճառն այն է, որ մադրիդցիները, դեմ գնալով հայ ժողովրդի հավաքական իղձերին, արդար հատուցում չպահանջեցին դարավոր ոսոխից եւ հետամուտ չեղան Սեւրի դաշնագրի բոլոր կետերի իրագործմանը: Թուրքամետ կեցվածքն ամենուրեք բերում է պարտությունների:
Հիմնադիր խորհրդարան. Ֆուտբոլի այս կանոններով հաջողության հասնելն անհնարին է: «Ռեալի» 11 խաղացողները պետք է վերցնեին մեկական գնդակ եւ խաղադաշտում մնային այնքան ժամանակ, մինչեւ հաղթանակ չտանեին:
Աշոտ Մանուչարյան. Պատճառը Եվրոպայի բարոյական կործանումն է եւ հատկապես «Ռեալում» LGBT համայնքի կործանիչ ազդեցությունը: Հաղթանակ կարելի է տանել՝ միայն զինվելով Ռուսաստանի եւ Պուտինի հոգեւոր բարձր արժեքներով:
Արամ Աբրահամյան
