Վարչապետ Հովիկ Աբրահամյանն այցելել է Արմավիրի մարզ: Կառավարության ղեկավարը նախ եղել է Եղեգնուտ համայնքում գտնվող Արմավիրի թռչնաբուծական ֆաբրիկայում, ծանոթացել վերջինիս գործունեությանը և ներդրումային ծրագրերին:
2013 թվականին հիմնադրված ֆաբրիկան զբաղվում է թռչնամսի արտադրությամբ: Ֆաբրիկայի ղեկավարները տեղեկացրել են, որ ընթացիկ տարում ծրագրվում է թռչնամսի արտադրական ծավալները հասցնել 4 հազար տոննայի, ինչը նախորդ տարվա համեմատ ավելի կլինի 30 տոկոսով: Արտադրական ծավալներն ավելացնելու նպատակով վերջերս ֆաբրիկայում ներդրվել են ժամանակակից նոր սարքավորումներ, այդ թվում ինկուբատորներ, ինչի արդյունքում ֆաբրիկան այլևս ստիպված չի լինի թռչունները ներկրել արտերկրից: Ֆաբրիկայում կատարված ներդրումները գնահատվում են 5-6 մլն դոլար:
Լրագրողների հետ զրույցում վարչապետ Աբրահամյանը նշել է, որ թռչնաֆաբրիկայում կատարվել են լուրջ աշխատանքներ՝ թռչնամսի արտադրության ուղղությամբ: «Մենք պետք է խրախուսենք մեր արտադրողներին և հնարավորություն տանք, որպեսզի ավելացնեն արտադրական ծավալները, ինչը կստեղծի նոր աշխատատեղեր, ժողովրդին կապահովվի տեղական արտադրանքով: Հայաստանը տարեկան ներկրում է 30-31 հազար տոննա թռչնամիս, իսկ տեղում արտադրում 9 հազար 400 տոննա: Կարելի է ներմուծել քիչ և շատ արտադրել: Այդ նպատակով, կառավարությունը պատրաստակամ է աջակցել ներքին արտադրողին»,- նշել է վարչապետը:
Կարդացեք նաև
Այնուհետև Հովիկ Աբրահամյանն Արմավիրի մարզպետարանում հանդիպել է մարզի համայնքների ղեկավարներին և հողօգտագործողներին: ՀՀ գյուղատնտեսության նախարար Սերգո Կարապետյանը և Արմավիրի մարզպետ Աշոտ Ղահրամանյանը ներկայացրել են գարնան գյուղատնտեսական աշխատանքների նախապատրաստական ընթացքն ու կատարված միջոցառումները:
Գյուղնախարարը նշել է, որ պետական օժանդակության բոլոր ծրագրերը լինելու են շարունակական: Կառավարությունը գյուղացիական տնտեսություններին կտրամադրի ներկրված բարձրորակ հացահատիկային մշակաբույսերի սերմացուն, մատչելի գնով պարարտանյութը և դիզելային վառելիքը: Սերգո Կարապետյանը շեշտել է, որ ՀՀ վարչապետի հանձնարարությամբ այսուհետ գյուղացիական վարկերը չորս տոկոսի փոխարեն սուբսիդավորվելու են 6 տոկոսով, իսկ վարկերը կտրամադրվեն ապրիլի մեկից: Միաժամանակ, նախարարը նշել է, որ գարնան գյուղատնտեսական աշխատանքները լավագույնս կազմակերպելու համար համապատասխան միջոցառումներ են իրականացվել նաև ոռոգման համակարգում: Վարչապետի հանձնարարությամբ վերանորոգվել են նաև մի շարք խորքային հորեր: Սերգո Կարապետյանի խոսքով՝ համապատասխան քայլեր են իրականացվում նաև բերքի մթերման, իրացման և վերամշակման գործընթացը համակարգված և կազմակերպված կերպով իրականացնելու ուղղությամբ: Միաժամանակ, նախարարը նշել է, որ կառավարությունը լինելու է գյուղացիների կողքին՝ ծագող խնդիրներին շուտափույթ լուծում տալու համար: Այդ նպատակով նախարարությունում ստեղծվել է նաև թեժ գիծ:
Իր հերթին, Աշոտ Ղահրամանյանը նշել է, որ մարզում հաջողությամբ սկսվել են գյուղատնտեսական աշխատանքները: Ընթացի մեջ է կառավարության տրամադրած սերմացուն, պարարտանյութը և դիզվառելիքը գյուղացիներին հատկացնելու գործընթացը: Մարզպետն ընդգծել է, որ ստեղծվել են բոլոր պայմանները՝ գարնանացանը լավագույնս կազմակերպելու համար: Համապատասխան աշխատանքներ են տարվում նաև գյուղմթերքի արտահանման ծավալներն ավելացնելու ուղղությամբ:
Վարչապետը դրական է գնահատել ՀՀ գյուղնախարարության և Ջրային տնտեսության պետական կոմիտեի կողմից գարնանացանի կազմակերպման ուղղությամբ կատարված նախապատրաստական աշխատանքները: «Նկատեցինք, որ գյուղացիների մոտ որևէ լուրջ դժգոհություն չկա: Այս տարի գարնանացանի նախապատրաստական աշխատանքները սկսել ենք դեռևս հունվարից և շատ կարևոր է, որ գյուղացին ոռոգման ջրի խնդիր չունենա: Մեզ համար կարևոր էր տեսնել, որ Արմավիրը՝ որպես գյուղատնտեսական մարզ, պատրաստ է գյուղատնտեսական աշխատանքներին: Կատարվել են համապատասխան աշխատանքներ, որոնք դրական եմ գնահատում»,- ասել է Հովիկ Աբրահամյանը: Միաժամանակ, կառավարության ղեկավարը կոչ է արել հողօգտագործողներին լոլիկի արտադրությունը հասցնել առավելագույնի, քանի որ այն ունի մեծ պահանջարկ: Վարչապետը նշել է, որ տարբեր գործիքակազմերով կառավարությունը պատրաստ է օժանդակել և՛ լոլիկ արտադրողներին, և՛ այն մթերող կազմակերպություններին: Հովիկ Աբրահամյանն արաբկիրցիներին տեղեկացրել է նաև, որ Արմավիր-Երասխավան ավտոճանապարհի ասֆալտապատման աշխատանքները կսկսվեն առաջիկայում:
Հանդիպման ընթացքում քննարկվել են նաև Արմավիրի մարզի համայնքներում ճանապարհաշինությանը, գազամատակարարմանը, ջրամատակարարմանը, ենթակառուցվածքների զարգացմանը վերաբերող մի շարք հարցեր:
ՀՀ կառավարություն
