Բազմաբնակարան շենքերի արդյունավետ կառավարումը, ընդհանուր օգտագործման տարածքների վերանորոգումը, էներգաարդյունավետության բարձրացումը, սպասարկումը դեռեւս չլուծված խնդիրներ են համարվում բազմաբնակարան շենքերի ֆոնդում, որոնք կարիք ունեն հրատապ լուծման: Այս տեսակետն այսօր «Արմենպրես» մամուլի ակումբում «Բազմաբնակարան շենքերի էներգաարդյունավետության և կառավարման արդի խնդիրներ. հեռանկարներ և օրենսդրական բարելավման առաջարկություններ» թեմայով ասուլիսին հայտնեց բնակարանաշինությամբ զբաղվող «Հաբիթաթ ֆոր Հյումենիթի Արմենիա» հիմնադրամի գործադիր տնօրեն Լուիզա Վարդանյանը:
«Բազմաբնակարան շենքերի խնդիրները կապված են ներկա սոցիալական իրավիճակի հետ եւ ոլորտի ինստիտուցիոնալ եւ օրենսդրական դաշտի ցածր արդյունավետության հետ»,-վստահեցնում է բանախոսը: Վերը նշված խնդիրները լուծելու նպատակով՝ «Հաբիթաթ ֆոր Հյումենիթի Արմենիա» կազմակերպությունն ուսումնասիրություն է իրականացրել՝ հիմք ընդունելով Վիշեգրադյան երկրների՝ Չեխիայի, Սլովակիայի, Լեհաստանի եւ Հունգարիայի օրենսդրական դաշտերը, ինչպես նաեւ Ուկրաինայի օրենսդրական դաշտը:
Բնակարանային ոլորտի փորձագետ Աստղինե Պասոյանն էլ ներկայացրեց այս երկրներում կատարված ուսումնասիրությունների փաթեթը: Փորձագետը տեղեկացրեց, որ ընտրվել են Վիշեգրադյան այդ 4 երկրները այն նպատակով, որ դրանք վերջին տարիներին բազմաբնակարան շենքերի կառավարման ոլորտում մեծ առաջընթաց են գրանցել եւ օրենսդրական բարեփոխումների մեծ էվոլյուցիա են ունեցել:
Հայաստանի բազմաբնակարան շենքերի ոլորտի կառավարման դաշտում փորձագետը մի շարք փոփոխություններ է առաջարկում. «Առաջինը՝ բազմաբնակարան շենքի բաժնային սեփականության՝ որպես գույքի գրանցման, չափագրման եւ անձնագրման խնդիրն է: Մենք, բացի մեր սեփական տարածքից տնօրինում ենք նաեւ ընդհանուր տարածքներ՝ տանիքներ, նկուղներ եւ այլն եւ այդ սեփականությունը իրավական ձեւակերպում չի ստացել՝ չկա համապատասխան փաստաթուղթ»:
Մյուս առաջարկը կայանում է նրանում, որ պետք է նորացնել շենքերի տեխնիկական անձնագրերը եւ ուշադրություն դարձնել այդ շենքերի էներգետիկ ցուցանիշների նկարագրմանը. «Մեր բնակֆոնդը սպառում է երկրում արտադրվող էլեկտրաէներգիայի 30 տոկոսը : Այս պարագայում տեխնիկական անձնագրերում էներգետիկ ցուցանիշների ներգրավումը թույլ կտա շենքերը էներգախնայող դարձնել եւ Հայաստանում էներգաարդյունավետությունը զարգացնել»:
Հաջորդ խնդիրը բազմաբնակարան շենքերի սպասարկման վճարներին է վերաբերում. «Վճարները չեն հավաքագրվում, կառավարման մարմինները բավական միջոցներ չեն տնօրինում, որպեսզի պատշաճ սպասարկվեն բազմաբնակարան շենքերը: Հետևաբար` օրենսդրական բարեփոխումների մեջ առաջնային խնդիրը հաշվարկման բանաձեւերի ճշտումն է, դրույքաչափերի սահմանումը եւ դրանց գանձման ավելի արդյունավետ ճանապարհների մշակումը»: Բազմաբնակարան շենքերի կառավարման, սպասարկման որակի բարձրացման տեսանկյունից մասնագիտացված կառույցների ներգրավման հնարավորությունն էլ մեկ այլ առաջարկ է:
Այս բոլոր բարեփոխումների համար, ըստ փորձագետի, անհրաժեշտ են ներդրումներ ոչ միայն պետության, այլեւ մասնավոր սեկտորի կողմից:
Ուսումնասիրությունների փաթեթը վերջնական տեսք կունենա մարտ ամսվա վերջին: Փաթեթը կյանքի կոչելու համար կազմակերպությունը կսկսի գործընկեր ֆոնդեր եւ բանկեր փնտրել:
Էլյա ՀՈՎՀԱՆՆԻՍՅԱՆ
