Եթե հայտնաբերում եք, որ ձեր եղունգները դեղին գույն են ստացել, մի շտապեք այն քողարկել եղունգների լաքի տակ: Որոշ դեպքերում եղունգերը «պատմում» են օրգանիզմի լուրջ հիվանդությունների մասին, ուստի առաջին հերթին պետք է գտնել պատճառը, նոր փորձել ազատվել այդ գույնից: Դեղնավուն երանգը երիկամների թուլության կամ դեղնախտի նշան կարող է լինել: Լինում է, երբ այդ երանգը պայմանավորված է նյութափոխանակության խնդրի, վիտամինների եւ հանքանյութերի բացակայության, ծխելու, եղունգների սնկային հիվանդության հետ: Բացի այդ, կարող է լինել դեղին եղունգների սինդրոմ, որի ժամանակ դադարում է նաեւ եղունգների աճը:
Եթե անցնեք բժշկական ստուգումը եւ որեւէ լուրջ հիվանդություն չհայտնաբերվի, ապա ժողովրդական բժշկության միջոցները ձեզ կօգնեն ազատվել դեղին գույնից:
Դեղին գույնը հրաշալի անցկացնում է կիտրոնի հյութը, որի համար եղունգները կիտրոնահյութի մեջ ընկղմեք օրական 3-4 անգամ:
Երիցուկի ծաղիկների թուրմը եւս շատ օգտակար է` այն պարունակում է եթերայուղեր եւ վիտամիններ, որը հնարավորություն է տալիս եղունգներին բերել բնական վիճակի: Մի քանի ճաշի գդալ երիցուկի ծաղիկները լցնել 250 միլիգրամ եռման ջրի մեջ եւ թողնել 30 րոպե: Այնուհետեւ ավելացնել կես լիտր ջուր եւ մաքուր ձեռքերը դնել այդ ջրի մեջ 20 րոպե:
Ծովի աղով եւ եթերայուղով պատրաստված ջուրը եղունգները ամրացնում է եւ տալիս գեղեցիկ փայլ: Ծովի աղով պատրաստված ջրին ավելացնել մի քանի կաթիլ եթերայուղ (թեյ ծառի, բերգամոնտ, ճանդան, էվկալիպտ) եւ եղունգները 30 րոպե դրեք այդ ջրում:
Եղունգների սպիտակեցման համար կարող եք թուրինջի 5 կորիզներով եւ ձիթապտղի կամ արեւածաղկի 1 ճաշի գդալ ձեթով պատրաստել թուրմ եւ օրական 3-4 անգամ քսեք եղունգներին:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
26.03.2015
