Հունահռոմեական ըմբիշ, աշխարհի 2001 թվականի չեմպիոն, Եվրոպայի առաջնության մրցանակակիր, միջազգային մրցաշարերի հաղթող Վաղինակ Գալուստյանն այսօր այցելեց Երեւանի Ռ. Սեւակի անվան N 151 հիմնական դպրոց, որտեղ ժամանակին սովորել է ինքը:
Անվանի մարզիկը եղավ ֆիզկուլտուրայի դահլիճում, շրջեց դպրոցում, գտավ այն նստարանը, որի առջեւ նստել է ինքը, հուզիչ ու շատ ջերմ հանդիպում ունեցավ իր դասղեկի հետ, իսկ հետո անկեղծ շփվեց աշակերտների հետ: Չեմպիոնին ուղղված հարցերը բազմաթիվ էին, սկսած նրանից, թե ինքն ինչպես է սովորել դպրոցում, վերջացրած մարզական հաջողություններով ու անձնական կյանքով:
«Զբաղվեք սպորտով, անպայման զբաղվեք, որովհետեւ սպորտն առաջին հերթին ձեր առողջությունն է: Սպորտը ձեր տարիքի պատանիների մեջ համառություն, նպատակ դնելու եւ դրան, անպայման, հասնելու որակներ է զարգացնում, որը միշտ պետք է կյանքում: Բայց մի բան էլ հաստատ իմացեք. առանց լավ սովորելու, գիտելիքներ ունենալու, շատ բան կկորցնեք կամ ոչնչի չեք հասնի: Օրինակ, երբ ես դպրոցական էի, իմ դասղեկը, որ աշխարհագրություն էր դասավանդում, պահանջում էր, որ այդ առարկան լավ սովորեմ՝ ասելով, որ երբ կյանքում մեծ մարզիկ դառնամ, մրցումների մեկնեմ տարբեր երկրներ ու չիմանամ դրանց պատմությունը, մի քիչ էլ՝ լեզուն, մեծ ամոթ կլինի: Ու պատկերացրեք, որ ուսուցիչս ճիշտ էր: Ես աշխարհագրություն առարկան բավականին լավ եմ սովորել: Ու, իսկապես, գիտելիքներն ինձ շատ օգտակար են եղել այդ երկրներում», – աշակերտներին հորդորեց աշխարհի չեմպիոնը:
Կարդացեք նաև
Աշոտ ՀԱԿՈԲՅԱՆ
