Առողջապահության նախարար Արմեն Մուրադյանն այսօր կառավարությունում հայտնեց, որ հանրապետությունում տարածված գրիպի վիրուսը, ինչի պատճառով երեխաներ են տեղափոխվել հիվանդանոցներ, դպրոցական արձակուրդները երկարաձգվել են ու որոշ մանկապարտեզներ փակվել, նահանջում է: Ըստ նրա, շտապօգնության կանչերի թիվը նվազել է, հիվանդանոց դիմողների թիվը` նույնպես: Նախարարն ասաց, որ փակվել են այն մանկապարտեզները, որտեղ սուր շնչառական հիվանդություն ունեցող երեխաները 25 տոկոսից ավելի են եղել:
Նախարարը ներկայացրեց ՀՀ կառավարության կողմից հավանության արժանացած «Դեղերի մասին» օրենքը` նշելով, որ բարեփոխված օրենքում ամրագրված է նաեւ դեղը դեղատոմսով ձեռք բերելու կարգը, դեղերի գրանցման, վերագրանցման հարցերը միջազգային պատշաճ կանոնակարգերին համապատասխանեցնելու եւ միջազգային շուկաներում պատշաճ ներկայանալու հարցերը:
Ժամանակ առ ժամանակ Արմեն Մուրադյանն անձամբ է պատասխանում «թեժ գծի» զանգերին: Հարցին՝ դա PR-ի նպատակով է արվում, պարոն Մուրադյանն ասաց` բացարձակ: Նախարարի տվյալներով, «թեժ գծով» եթե նախկինում ստանում էին 5000 ահազանգ, ապա այսօր դրանց թիվը հասել է 12 հազարի:
Արմեն Մուրադյանն անդրադառնալով A, B, C հեպատիտներով վարակվելու բարձր ցուցանիշին, ասաց, որ ներհիվանդանոցային վարակն այսօր համակարգի լրջագույն խնդիրներից մեկն է, որոնց դեմ պայքարելու համար նորմատիվային դաշտ է մշակվել:
Կարդացեք նաև
Լուսինե ԲՈՒԴԱՂՅԱՆ
