Նաիրիտցիները շարունակում են իրենց 18-24 ամսվա աշխատավարձերի մարման պահանջով բողոքի ցույցերը: Այսօր վաղ առավոտից գործարանի նախկին աշխատակիցները հավաքվել էին կառավարության շենքի դիմաց:
Նաիրիտցիներն ասում են, որ իրենց բողոքի ցույցերը շարունակելու են այնքան ժամանակ, քանի դեռ հստակ ժամանակացույց չեն տվել կառավարությունից: «Եթե մեզ «երբ»-ը ասեն, մենք կհամբերենք, մենք մեր փողն ենք ուզում, ողորմություն չենք ուզում»,- ասում են նաիրիտցիները:
Նաիրիտցիները նաեւ բողոքում են, որ գործարանի հեռացված աշխատակիցներին գումար չեն տալիս, իսկ դեռեւս այնտեղ աշխատողներին մեկ ամսվա աշխատավարձ են խոստացել: Ըստ նրանց՝ սա աշխատանքային օրենսգրքի խախտում է:
Մեզ հետ զրույցում «Նաիրիտի» բողոքի ցույցերը համակարգող խմբի անդամ Անուշ Հարությունյանը ասաց, որ նաիրիտցիների համբերության բաժակն արդեն լցվել է: «Անընդհատ ասում են, որ աշխատավարձը կտան, բայց չեն տալիս, դրա համար մարդիկ կարող են հուսահատ քայլերի դիմել»:
Կարդացեք նաև
Նաիրիտցիներն իրենք են հաստատում, որ իրենք հույսը կորցրել են: Ազգային ժողովում հանդիպման հետ նրանք հույս չեն կապում: Այսօր նրանք պաշտոնատար անձանց չարաշահումները բացահայտելու նպատակով նամակ կներկայացնեն գլխավոր դատախազություն, սակայն, ինչպես իրենք են նշում՝ դրանից էլ ոչ մի ակնկալիք չունեն:
Մանրամասները՝ տեսանյութում:
Էլյա ՀՈՎՀԱՆՆԻՍՅԱՆ
