Բաց նամակ Երևանում ծառերի հատման թույլտվություններ տվողներին

Համահայկական բնապահպանական ճակատին է դիմել Երևանի Աբովյան փողոցի բնակիչ Անուշ Առաքելյանը, ում նամակը ներկայացնում ենք ստորև:

«Երևան քաղաքի Աբովյան փողոցի բնակիչներս օրերս ականատես եղանք, թե ինչպես կտրեցին մեր փողոցի վիթխարի ծառերից մեկը, որը հավանաբար մոտ 50 տարվա/կես դար/ կամ ավել պատմություն ուներ: Մեր հարցին, թե ինչու՞ է կտրվում ծառը, և ո՞վ է թույլ տվել, մեզ ցույց տվեցին մի փաստաթուղթ, որտեղ գրված էր, որ ծառերը վարակված են «հոլանդական» հիվանդությամբ և անհրաժեշտ է հատել: Խրախուսելի է, որ մտահոգված եք կանաչ զանգվածի առողջացման հարցով: Պատկառելի մարդկանց 8 ստորագրություն, որոնք որոշում են կայացրել հատել այդ հիվանդ ծառերը:
1.ՀՀ ԳԱԱ բուսաբանության ինստիտուտի տնօրեն, ՀԱԱՀ Տնտեսագիտության ամբիոնի վարիչ կ.գ.թ. պրոֆեսոր՝ Ժ. Վարդանյան
2.ՀԱԱՀ տնտեսագիտության ամբիոնի կ.գ.թ. դոցենտ՝ Հ. Խուրշուդյան
3.ՀԱԱՀ անտառագիտության ամբիոնի կ.գ.թ. դոցենտ՝ Ա. Գրիգորյան
4. «Հանուն կայուն մարդկային զարգացման» ասոցիացիայի նախագահ կ.գ.թ. ա.գ.դ. պրոֆեսոր՝ Կ. Դանիելյան
5.Երևանի քաղաքապետարանի աշխատակազմի բնապահպանության վարչության պետ՝ Ա. Մարտիրոսյան
6. Երևանի քաղաքապետարանի աշխատակազմի բնապահպանության վարչության պետի տեղակալ գ.գ.թ.՝ Ս. Մաքսապետյան
7. Երևանի քաղաքապետարանի աշխատակազմի բնապահպանության վարչության գլխավոր մասնագետ-Էկոլոգ՝ Դ. Գրիգորյան
8. Երևանի քաղաքապետարանի աշխատակազմի բնապահպանության վարչության գլխավոր մասնագետ-դենդրոլոգ՝ Ա. Հազարապետյան:

Ուզում եմ դիմել մի քանի հարցով

Կա՞ արդյոք մի փաստաթուղթ որտեղ Դուք նույնպես դրել եք Ձեր ստորագրությունները և ստանձնել եք պարտավորություն նոր ծառեր տնկելու համար:
Կա՞ արդյոք, որևէ վերահսկող հանձնաժողով, որը հետևում է ծառատունկի աշխատանքներին: Փորձը ցույց է տալիս, որ հատված ծառերի փոխարեն աճում են բետոնե պատեր և սրճարաններ:
Հորդորում ենք Ձեզ հետևել հատած ծառերի փոխարեն նույն տեղում նոր ծառեր տնկելու գործընթացին և թույլ չտալ օգտագործել Ձեր ստորագրությունները այլ նպատակների համար: Հուսով լինենք, որ մեր երեխաներն ու թոռները հնարավորություն կունենան վայելել ծառերի առկայությունը մեր քաղաքում:
Ակնկալում եմ պատասխան իմ նամակին, որը բաց եմ գրում, քանի որ մեր քաղաքի բնակիչների մեծ մասին է հուզում այս հարցը, սակայն անպատասխան է մնում»:

Մեր կողմից ավելացնենք, որ նույն հարցերն են առաջանում նաև ծառերի խորը էտը թույլատրելու և իրականացնելու գործընթացին:

Համահայկական բնապահպանական ճակատ (ՀԲՃ)