Քիչ առաջ խորհրդարանը միաձայն որոշմամբ՝ 117 կողմ քվեարկության արդյունքներով ընդունեց ԱԺ 6 խմբակցությունների կողմից մշակված «1915-1923 թթ Օսմանյան Թուրքիայում հույների եւ ասորիների ցեղասպանությունը դատապարտելու մասին» հայտարարությունը:
Քվեարկության արդյունքները տեսնելով՝ պատգամավորները ոտքի կանգնեցին եւ հոտնկայս ծափահարեցին միմյանց:
Մինչ քվեարկությունը ԲՀԿ խմբակցության ղեկավար Նաիրա Զոհրաբյանը պնդեց այն, ինչ ասվել էր երեկ՝ քննարկման ժամանակ: Այն է՝ եզդիների ցեղասպանությանը նույնպես անդրադառնալ: Նա ասաց, որ երեկվանից զանգեր է ստանում եւ չպետք է կրոնական տարանջատում դնել՝ ով է քրիստոնյա, ով՝ չէ: Ցեղասպանությունը ցեղասպանություն է: Նա ասաց, որ ԲՀԿ-ն առաջիկայում կազմակերպելու է եզդիական համայնքի հետ քննարկում: Նրանք փաստեր ունեն, որ եզդիները ենթարկվել են ցեղասպանության եւ կներկայացնեն իրենց փաստերը:
Հիշեցնենք, որ եզդիների՝ քրիստոնյա չլինելու մասին դիտարկում էր արել նախագիծը ներկայացնող Էդուարդ Շարմազանովը:
Կարդացեք նաև
Չնայած դրան, ԱԺ նախագահ Գալուստ Սահակյանը պատասխանեց, թե երեկ ամբողջ օրը քննարկվել է հարցը եւ որեւէ կրոնական տարբերության մասին խոսք չի գնացել. «առավել եւս մեր ազգային մենթալիտետը ինձ հուշում է ասելու, որ մենք որեւէ կրոնի նկատմամբ որեւէ բացասական դիրքորոշում մինչեւ այսօր չենք ունեցել ո՛չ մենք, ո՛չ հայ ժողովուրդը: Ինչ վերաբերում է եզդիներին, պետք է փաստեր լինեն»:
Հռիփսիմե ՋԵԲԵՋՅԱՆ
