Եվրասիակա՞ն, թե՞ Եվրոպական ուղղությունը պետք է գերակա լինի Հայաստանի համար`հարցը ԲՀԿ-ում դեռ չեն քննարկել ու հստակեցրել: Հիշեցնենք, ՀՀ-ին ԵՏՄ անդամակցության հարցի քվեարկության ժամանակ ԲՀԿ-ում մոտեցումը միանշանակ չէր: ԲՀԿ արդեն նախկին նախագահ Գագիկ Ծառուկյանի բիզնեսները հիմնականում եվրասիական միության անդամ երկրների հետ էին: Իսկ ԲՀԿ ներկայիս նախագահ Նաիրա Զոհրաբյանը ԱԺ եվրոպական ինտեգրացիայի հանձնաժողովի նախագահն է:
«Կողմնակից ենք նրան, որը բարին կբերի մեր ժողովրդին: Մենք պատրաստ ենք եւ այս, եւ այն կողմի հետ աշխատել: Փորձում ենք այդտեղից քաղել այն, որը նպաստ կբերի մեր ժողովրդին»,- Aravot.am-ի հետ զրույցում ասաց ԲՀԿ-ական պատգամավոր Վահան Կարապետյանը: Դիտարկմանը, որ «եւ-եւ»-ի քաղաքականությունը իշխանության հռչակած կարգախոսն է, ԲՀԿ-ական պատգամավորը հակադարձեց. «Մենք անելու ենք այն, ինչն օգուտ կբերի մեր ժողովրդին, ժողովրդին այս ծանր վիճակից կհանի»:
Հետաքրքրվեցինք`պատգամավորի կարծիքով ի՞նչ օգուտներ կան ԵՏՄ-ից, որին արդեն երրորդ ամիսն է Հայաստանը պաշտոնապես անդամակցում է եւ ի՞նչ օգուտներ կարող են ակնկալել ԵՄ-ից. «Նրանք մեր անմիջապես հարեւաններն են, եվրոպացիներն էլ, կարծում եմ, մեզ բարի կամեցողներ են ու պետք չի մեջքով շրջվել նրանց: Բարի դրացիական հարաբերությունները պետք է պահել նաեւ եվրոպացիների հետ»:
Հարցին`երկու լարի վրա խաղալով սայթաքելու վտանգը չի՞ մեծանում, Վահան Կարապետյանը պատասխանեց. «Լարի խաղալու հարց չի. եթե ձախ հարեւանի հետ լավ եմ, ի՞նչ պարտադիր ա, որ աջի հետ վատ լինեմ: Երկուսն էլ իմ հարեւաններն են, երկուսին էլ ընդունում ենք`ամեն մեկին իրա չափով, ձեւով, իրա տեսակով»:
Կարդացեք նաև
Նելլի ԳՐԻԳՈՐՅԱՆ
