Եթե տավարի լեզուն նախորդ օրն արդեն խաշել եք, ապա այս ուտեստը պատրաստելը չի խլի ոչ մի ջանք, եւ կտա հիանալի արդյունք: Ավելին, խաշած տավարի լեզուն կարելի է պահել սառցարանում եւ օգտագործել՝ պետք եղած ժամանակ:
Անհրաժեշտ մթերքները
Տավարի լեզու- 1 հատ
Կանաչ ոլոռ- 1 տուփ (500 գրամ)
Սեփական հյութի մեջ պահածոյացված լոլիկ- 1 տուփ (500 գրամ)
Սխտոր- 2-3 պճեղ
Ձիթապտղի յուղ- 1-2 գդալ
Չորացրած եւ թարմ կանաչիներ
Պատրաստման եղանակը
Կարդացեք նաև
Տավարի լեզուն լավ լվանալ եւ առատ ջրով երկար խաշել, ավելի քան 4 ժամ, պարբերաբար՝ ջուր ավելացնելով, որպեսզի լեզուն անընդհատ ընկղմված լինի ջրի մեջ: Վերջին 10-15 րոպեի ընթացքում ավելացնել 1 ճաշի գդալ աղ: Եռացող ջրից հանել եւ տաք-տաք վիճակում մտցնել սառը ջրի մեջ, կամ պահել սառը ջրի ծորակի տակ: Այս եղանակով շատ արագ եւ հեշտությամբ լեզվի վրայի սպիտակ կաշին դուրս է գալիս: Պետք է ամբողջությամբ հեռացնել այդ կաշին, ավելորդ յուղային եւ ջլային մասերը: Այս վիճակում լեզուն կարելի է պահել սառնարանում՝ մեկ-երկու օր, սառցախցիկում՝ 1-2 ամիս եւ օգտագործել, երբ հարմար է:
Խաշած լեզվուն կտրատել: Որեւէ հրակայուն, ցանկալի է՝ կավե ամանի մեջ տեղավորել լեզվի կտորները, վրան կտրատած սխտոր, չոր կանաչեղեն ավելացնել, ապա լցնել լոլիկը՝ իր հյութով: Դնել 230-250 աստիճան տաքացրած ջեռոցը մոտ 20 րոպեով, ավելացնել ջրքամած ոլոռը, եւս 5 րոպեով դնել ջեռոցը: Ջեռոցից հանելուց հետո վրան ձիթապտղի յուղ եւ կտրատած թարմ կանաչի ավելացնել:
Բարի ախորժակ:
Պատրաստեց
ՄԵԼԱՆՅԱ ԲԱՐՍԵՂՅԱՆԸ
«Առավոտ»
21.03.2015
