Բռնցքամարտի Հայաստանի առաջնության եզրափակիչ մենամարտերի անցկացման նախօրեին ազգային հավաքականի գլխավոր մարզիչ Դավիթ Թորոսյանը Aravot.am-ի հետ կիսվեց իր տպավորություններով:
«Ընդհանուր առմամբ բռնցքամարտիկներից ստացած տպավորություններս այնքան էլ բարձր չեն, բայց չէի ասի, թե վատ են: Առաջընթաց կա, բայց իմ սպասածից դանդաղ: Դա, թերեւս, կապված է այն բանի հետ, որ մրցաշրջանի առաջին փուլում ենք, որ տարվա գլխավոր մեկնարկներին դեռ հատուկ ուղղված նախապատրաստությանը ձեռնամուխ չենք եղել: Բայց, կարծում եմ, որ մեր մարզիկները լուրջ ներուժ ունեն կարեւոր մրցումներին պատշաճ նախապատրաստվելու համար: Նկատի ունեմ Բաքվում կայանալիք ամառային խաղերը, որին մասնակցելը դեռ կասկածելի եմ համարում, Եվրոպայի առաջնությունը՝ Բուլղարիայում, որը մեկնարկելու է Բաքվից մոտ մեկ ամիս հետո եւ վերջապես աշխարհի առաջնությունը՝ Հյուսթոնում ու օլիմպիական վարկանիշային մրցաշարերը: Մենք աշխատում ենք մեր ծրագրով՝ աչքի առաջ ունենալով առաջին հերթին Եվրոպայի եւ աշխարհի առաջնությունները եւ օլիմպիական վարկանիշային մրցաշարերը: Իսկ Եվրոպական խաղերը մեզ ոչինչ չեն տալու», – ասաց գլխավոր մարզիչը:
Աշոտ ՀԱԿՈԲՅԱՆ
