Այսօր թերթերից մեկին տված հարցազրույցում Ազգային անվտանգություն կուսակցության նախագահ Գառնիկ Իսագուլյանը հայտարարել է, որ ճիշտ կլիներ ԲՀԿ վերջին համագումարի ժամանակ բոլորը Ծառուկյանի հետ միասին լքեին կուսակցությունը, իսկ ԲՀԿ խմբակցության բոլոր անդամները վայր դնեին իրենց պատգամավորական մանդատները, հայտարարելով՝ «Մենք բոլորս Ծառուկյան ենք»։
Այս առիթով Aravot.am-ի հետ զրույցում ԲՀԿ մամուլի խոսնակ Վահան Բաբայանն ասաց. «Բարգավաճ Հայաստան» կուսակցությունը մեկ հոգանոց կուսակցություն չէ՝ այլ բազմահազարանոց: Կուսակցության բանալին էլ մեզանից որեւէ մեկի գրպանում չէ, եւ ոչ էլ կուսակցությունը օբյեկտ է, որ որոշում կայացնես ու դուռը փակես։ Մենք պատասխանատվություն ունենք մեզ ընտրած հարյուր հազարավոր քաղաքացիների առաջ, ովքեր այսօր էլ վստահությամբ կանգնած են մեր կողքին։ Ուստի, պետք չէ Պապից ավելի կաթոլիկ լինել ու ռեալ քաղաքականության հետ որեւէ աղերս չունեցող հայտարարություններ անել»։
Նա հավելեց նաեւ, որ Գագիկ Ծառուկյանն ինքն է իր որոշումը կայացրել եւ խորհուրդ տվեց բոլորին` ինչպես իրենք են հարգանքով վերաբերվել այդ որոշմանը, իրենք եւս հարգեն մարդու կայացրած անձնական որոշումը։
Նելլի ԳՐԻԳՈՐՅԱՆ
