Քաղաքագետ Հրանտ Մելիք-Շահնազարյանի համար նախագահ Սերժ Սարգսյանի դիրքորոշումը՝ Ադրբեջանին զենք վաճառելու Ռուսաստանի քաղաքականության վերաբերյալ, նոր չէ:
Հիշեցնենք, որ նախագահը երեկ հայտարարել էր, որ հայ-ռուսական հարաբերությունների վրա վատ ազդեցություն կթողնի Ադրբեջանին զենք վաճառելու Ռուսաստանի քայլերը:
«Մինչեւ նախագահի հայտարարությունը ունեցել ենք նաեւ արտաքին գործերի նախարարի մեկնաբանությունը: Օգտագործելով առաջիկա հանդիպումների առիթը նախագահը քննարկման օրակարգ կմշակի ռուս գործընկերոջ հետ, եւ զենքի վաճառքի հարցը հաստատ քննարկման առանցքային հարցը կլինի»,-Aravot.am-ին ասաց քաղաքագետը:
Մեր հարցին, թե նախագահի այդ հայտարարությունը դրական արձագանք կգտնի՞ Ռուսաստանում, թե՞ հայկական կողմի կարծիքը հաշվի չեն առնում, քաղաքագետն ասաց. «Հայ-ռուսական հարաբերությունները, իսկապես, գտնվում են շատ բարձր մակարդակում, այնպես որ կարծում եմ՝ Ռուսաստանը հետեւություններ կանի ու չի արհամարհի հայկական կողմի մտահոգությունները: Հայաստանի կոչերին ընդառաջ գնալը բխում է նաեւ Ռուսաստանի շահերից՝ տարածաշրջանում կայունություն պահպանել ու ունենալ ուժեղ դաշնակից»:
Կարդացեք նաև
Մեր հարցին, անպայման հայկական կողմը պե՞տք է բարձրաձայներ զենքի վաճառքի խնդիրը, որ ռուսական կողմը գիտակցեր, Հրանտ Մելիք-Շահնազարյանը շարունակեց. «Խնդիրը հենց այդտեղ է հասել ու նման մոտեցման անհրաժեշտությունը կար, հարցը բարձրաձայնելու խնդիր, իսկապես, կար»:
Նրա խոսքով, Ռուսաստանը, հակառակ Ադրբեջանի ցանկության, վերջին շրջանում զենքի տրամադրման նոր պայմանագրեր չի կնքում:
Արփինե ՍԻՄՈՆՅԱՆ
