Դաշնակցությունը հետեւողականորեն շարունակում է ինքնաբացահայտումների շարքը։ Հերթական քայլն այս անգամ արել է ԱԺ ՀՅԴ խմբակցության պատգամավոր Արծվիկ Մինասյանը։
«Մենք շատ հստակ ենք ասել՝ այո, ընտրությունները կեղծված են եղել, վիճահարույց են, բայց մենք ընդունում ենք գործող նախագահին որպես լեգիտիմ։ Դրա համար մենք չենք միանում մի շարք նախաձեռնությունների, որոնք պաշտոնանկության հարց են դնում ոչ միայն այն պատճառով, որ պարզապես անիմաստ է նման խնդիր քննարկելը, այլ նաեւ ընդունում ենք, որ երկրի նախագահը Սերժ Սարգսյանն է եւ դրա համար էլ բանակցում ենք սահմանադրական փոփոխությունների հարցի շուրջ, մեր առաջարկությունները ներկայացնում ենք»,- հայտարարել է Արծվիկ Մինասյանը։
Նույն միտքը հաստատել է նաեւ ՀՅԴ բյուրոյի անդամներից Արտյուշա Շահբազյանը՝ ասելով, որ Ս. Սարգսյանի լեգիտիմ չլինելու մասին իրենք որոշում չունեն, իսկ Դաշնակցությունը եւ դաշնակցականները շարժվում են որոշումներով։
Այս հայտարարությունը, ըստ էության, կարելի է համարել քաղաքական աբսուրդի ժանրից։ Կեղծված ընտրությունների արդյունքում որեւէ պաշտոնի հայտնված մարդը երբեք չի կարող համարվել լեգիտիմ, չի կարող լինել օրինակարգ։ Ի վերջո, լեզիտիմությունն ինքնին ենթադրում է՝ պետական իշխանության կարգավիճակի օրինականության ճանաչում կամ հաստատում։ Ու եթե այդ իշխանության ձեւավորման գործընթացի շրջանակներում տեղի են ունեցել ապօրինություններ, օրինականության ճանաչման մասին խոսելն ինքնին ավելորդ է։ Իսկ Սերժ Սարգսյանը, ինչպես հայտնի է, Հայաստանում իշխանության գլխին հայտնվեց նախագահական ընտրություններում տեղի ունեցած համատարած ընտրակեղծիքների եւ 2008թ. մարտի 1-ի տասը զոհերի արյան գնով, 2013թ. կրկին ընտրակեղծիքների արդյունքում ամրապնդեց իր իշխանությունը՝ երկրորդ ժամկետում երկարացնելով պաշտոնավարումը։
Կարդացեք նաև
Սակայն մյուս կողմից նկատենք, որ այս հայտարարության հեղինակը դաշնակցական է, իսկ դաշնակցականների կողմից նմանատիպ հայտարարությունները վաղուց ի վեր դարձել են սովորական երեւույթ. «դեմ ըլլալով կողմ գոռալը» դաշնակցականների՝ ավելի քան 120-ամյա կենսակերպն է։ Արծվիկ Մինասյանի հայտարարությունը հենց այդ տրամաբանության շրջանակներում է»:
Արման ԳԱԼՈՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
