Aravot.am-ի հետ զրույցում նման համոզմունք հայտնեց Գյումրիում դաժանաբար սպանված Հասմիկ Ավետիսյանի քույրը՝ Ռիտա Պետրոսյանը, որը երկու օր առաջ մասնակցել է դատաձգաբանական փորձաքննությանը: «Եթե զենքի վրա խլացուցիչ չի եղել, ուրեմն շուրջբոլորը լավ էլ լսել են կրակոցների ձայներ, ո՞նց կլինի, որ չլսեին երեխաների ճիչը, մղկտոցը, սուտ կլինի, որ չեն լսել…Իհարկե, էդ մարդկանց էլ հասկանալ է պետք, իրենք իրենց կաշվից են վախենում, ասում են՝ չենք լսել, ի՞նչ երաշխիք ունենային, որ միջամտելու դեպքում հաջորդ զոհը իրենք չէին: Թեև Աստված չանի, եթե ես նման դաժանություն լսեի, գոնե հեռախոսը կվերցնեի, օգնություն կկանչեի»:
Ռիտա Պետրոսյանը դատաձգաբանական փորձաքննության հետ կապված ասաց. «Կարող է մի հրազենից կրակելով սպանեին մեր հարազատներին, բայց մեզ համար այդպես էլ անհայտ մնաց՝ Պերմյակո՞վն է եղել, մենա՞կ է գործել, թե՞ խմբով: Փորձաքննության ժամանակ մեզ ցույց տվեցին զենքը, փամփուշտները, սալդատսկի կոշիկները, հագուստը, մերոնց հագից հանված հագուստները, բայց, իհարկե, մենք ձեռք չտվեցինք այս ամենին: Մեր փաստաբանները շատ լավ են աշխատում, Լուսինե Սահակյանը շատ յուրահատուկ է, թեև մենք Սարգսյան Երեմից էլ գոհ ենք, բայց ամեն ինչ կախված է քննիչներից, ինչ իրենց ձեռք է տալիս, ասում են, ինչ ձեռք չի տալիս, չեն ասում: Իմ հոգեկանը արդեն խանգարվում է , ես հոգեբանի կարիք ունեմ, առողջությունս շատ վատ է, աչքիս առաջ ամեն վայրկյան դուռը բացելն ու քրոջս ընտանիքին սպանված գտնելու դաժան տեսարանն է:Ես կամաց-կամաց մարում եմ, զգում եմ, որ մեր մասին մտածող չկա » ,- նեղվեց տիկին Ռիտան:
Նա ասաց, որ բոլոր փորձաքննություններին իրենք մասնակցելու են:
Նունե ԱՐԵՎՇԱՏՅԱՆ
