Մարտի 18-ին ՀՀ Ազգային ժողովում աշխատանքն է շարունակել Եվրանեսթ խորհրդարանական վեհաժողովի չորրորդ լիագումար նիստը, որը վարել են Եվրանեսթ ԽՎ համանախագահներ Հեյդի Հաուտալան եւ Բորիս Տարասյուկը:
Մասնակիցները քննարկել են Եվրոպական հարեւանության քաղաքականության վերանայման եւ Արեւելյան գործընկերության Ռիգայի առաջիկա գագաթաժողովի վերաբերյալ հարցեր:
Զեկույցով հանդես է եկել ԵՄ ընդլայնման եւ հարեւանության հարցերով հանձնակատար Յոհաննես Հանը: Գլխավոր հանձնակատարն, անդրադառնալով հարեւանության քաղաքականությանը, նշել է, որ ԵՄ-ն ցանկանում է գործընկեր լինել Արեւելյան գործընկերության բոլոր երկրների հետ՝ ճանաչելով եւ պաշտպանելով յուրաքանչյուր երկրի ուրույն քաղաքականությունը: Յոհաննես Հանի խոսքով՝ իրենց միակ նպատակը բարեկեցիկ ապագայի կառուցումն է:
Պարոն Հանի բնորոշմամբ՝ ներկայում հարեւանության քաղաքականությունը փոփոխվել է, առաջ են եկել մի շարք մարտահրավերներ հարեւան երկրներում: Ուստի, հանձնակատարի խոսքով, պետք է տարբերակված մոտեցում ցուցաբերել եւ գիտակցել, որ յուրաքանչյուր երկիր տարբեր է ոչ միայն մշակույթով, այլեւ քաղաքական մոտեցումներով եւ շահերով:
Կարդացեք նաև
Անդրադառնալով Հայաստանի որդեգրած արտաքին քաղաքականությանը՝ Յոհաննես Հանը նշել է, որ ԵՄ-ը պատրաստ է հետագայում եւս համագործակցել Հայաստանի հետ, շարունակել աջակցությունը մարդու իրավունքների պաշտպանության, կոռուպցիայի դեմ պայքարի, ժողովրդավարության, ընտրական բարեփոխումների ուղղությամբ: Յոհաննես Հանի խոսքով՝ Հայաստանի հետ քննարկել են հետագա համագործակցության հեռանկարները եւ պատրաստ են շարունակել այն: Հանձնակատարը տեղեկացրել է, որ կշարունակեն աջակցել նաեւ Հայաստանի քաղաքացիական հասարակությանը:
ՀՀ ԱԺ Եվրանեսթ խորհրդարանական վեհաժողովի պատվիրակության ղեկավար, ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը ողջունել է հանձնակատարի մասնակցությունը լիագումար նիստի աշխատանքներին:
Նրա խոսքով՝ բոլոր դիտարկումները, որոնք հնչել են, հաշվի կառնվեն հետագայում, եւ կշարունակվի Արեւելյան գործընկերության ինտեգրմանն ուղղված քաղաքականության մշակումը:
Արտակ Զաքարյանի բնորոշմամբ՝ Հայաստանի համար միշտ էլ կարեւոր է եղել ԵՄ-ի հետ համագործակցությունն ու քաղաքական երկխոսությունը: Պատգամավորի խոսքով՝ ՀՀ-ի համար հավասարակշռված եւ բազմավեկտոր քաղաքականությունը շարունակում է մնալ մեր երկրի քաղաքականության կարեւոր առանցքը:
Այնուհետեւ քննարկվել է ԵՄ ֆինանսական աջակցությունը արդարադատության ոլորտի վերաբերյալ հարցը: Հիմնական զեկուցողն էր Արեւելյան գործընկերության հարեւանության, աշխարհագրական համակարգման բաժնի վարիչ Անդրեա Մաթեո Ֆոնտանան: Նա մասնավորապես անդրադարձել է արդարադատության ոլորտին, ծրագրերի շրջանակում բարեփոխումների առաջընթացին:
Պարոն Ֆոնտանան նշել է, որ համագործակցում են Արեւելյան գործընկերության բոլոր երկրների հետ արդարադատության ոլորտում: Ըստ նրա՝ արդարադատությունը քաղաքական արժեք է, որն ունի նաեւ հասարակական եւ տնտեսական կարեւոր նշանակություն: ԵՄ-ն ունի ընթացիկ արդարադատության բարեփոխումների ծրագրեր, որոնք իրականացնում է Եվրանեսթի անդամ բոլոր երկրներում: Ըստ Ֆոնտանայի՝ հիմնական խնդիրներն են կոռուպցիայի դեմ պայքարը, դատական իշխանության, արդարադատության համակարգի թափանցիկության ապահովումը:
Պատգամավորներն այնուհետեւ քննարկել են Եվրանեսթ ԽՎ-ի եւ մշտական հանձաժողովների կանոնակարգերում փոփոխությունները եւ ընդունել են առաջարկներ:
Եվրանեսթ ԽՎ համանախագահ Բորիս Տարասյուկը տեղեկացրել է, որ քանի որ Ուկրաինայի պատվիրակության համանախագահությունն ավարտվում է, միաձայն որոշվել է, որ համանախագահությունը կփոխանցվի Վրաստանը ներկայացնող Վիկտոր Դոլիձեին:
Եվրանեսթ ԽՎ-ի համանախագահ Հեյդի Հաուտալան, ինչպես նաեւ պատգամավորները շնորհակալություն են հայտնել Բորիս Տարասյուկին համանախագահության շրջանակում արդյունավետ աշխատանքի համար:
Եվրանեսթ ԽՎ-ը ավարտել է չորրորդ լիագումար նիստի աշխատանքները:
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱԶԳԱՅԻՆ ԺՈՂՈՎ
ՀԱՍԱՐԱԿԱՅՆՈՒԹՅԱՆ ԵՎ ՏԵՂԵԿԱՏՎՈՒԹՅԱՆ ՄԻՋՈՑՆԵՐԻ ՀԵՏ ԿԱՊԵՐԻ ՎԱՐՉՈՒԹՅՈՒՆ
