Երեւանում շարունակվող Եվրանեսթ խորհրդարանական վեհաժողովի չորրորդ լիագումար նիստում եվրոպացի պատվիրակ Անդրեա Մատտեո Ֆոնտանան անդրադարձավ Արեւելյան գործընկերության երկրներին արդարադատության ոլորտում ԵՄ-ի ֆինանսական աջակցությունը, բարեփոխումների խթանման ծրագրերին: Ըստ այդմ, Հայաստանում, Վրաստանում, Ադրբեջանում, Ուկրաինայում, Մոլդովայում վերջին տարիներին ներդրվել է 200 միլիոն եվրո, դատաիրավական համակարգում տարբեր ծրագրեր իրականացնելու համար:
ԱԺ Ժառանգություն խմբակցության քարտուղար Թևան Պողոսյանն իր ելույթում նկատեց, որ հետխորհրդային երկրներում անկախ դատական համակարգ գոյություն չունի: Ավելին, ըստ նրա, կրթական համակարգում առկա կոռուպցիան անուղղակիորեն ազդում է նաեւ դատական համակարգի կոռումպացման վրա:
Եվրանեսթ ԽՎ համանախագահ Հեյդի Հաուտալան դիտարկում արեց, որ սա այն կարևոր ոլորտներից է, որի իրացման համար Եվրանեսթը և ԱԼԳ-ն պետք է պայքարեն. «Այդ հիմնարար ազատությունների համար վաղն առավոտյան բանավեճ է տեղի ունենալու քաղհասարակության ներկայացուցիչների հետ Եվրանեսթի շրջանակներում, հուսով եմ՝ հայկական պատվիրակությունը նույնպես կմասնակցի»:
Դատական համակարգի կոռումպացված լինելու խնդիրը թիվ մեկը համարեց նաեւ ԱԺ ՕԵԿ խմբակցության քարտուղար Մհեր Շահգելդյանը:
ԲՀԿ խմբակցության պատգամավոր Նաիրա Զոհրաբյանն էլ հավելեց, որ ՀՀ-ում անցկացված հարցումներն ապացուցում են, որ հանրության գերակշիռ մասը բողոքում է դատական համակարգում կոռուպցիայից: Այս համատեքստում նա գործընկերներին կոչով արեց` հնարավոր իրավական փաստաթղթի հիմքում հիմնական շեշտադրումն արվի արդարադատության անկախության խնդրին:
Վրաստանի պատվիրակ Վիկտոր Դալիձեն, խոսելով իր երկրի մասին, ասաց, որ արդարադատության համակարգն այսօր Վրաստանում էլ դեռ հեռու է եվրոպական ստանդարտներից. «Վրաստանում ԵԱՀԿ-ն փաստագրական առաքելություն էր իրականացվում, և արդյունքներով հանդես եկան, բայց հաշվետվությունը հաշվետվություն է, իսկ գործողությունը՝ գործողություն, ուստի հաճելի կլիներ հասկանալ այդ հաշվետվությունները ինչ գործողություների են հանգում»:
Նելլի ԳՐԻԳՈՐՅԱՆ
