Մարդն ամբողջ կյանքի ընթացքում շրջապատված է տարբեր ձայներով` ազդանշաններ, թխկթխկոցներ, աղմուկ եւ այլն: Քչերն են մտածում, որ ինչպիսի ձայնային միջավայրում ապրում են, նույնպիսի առողջական վիճակ ունեն: Գիտնականներն ապացուցել են, որ աղմուկը վատ անդրադարձ ունի մեր օրգանիզմի վրա: Աղմուկի վնասը կախված է նրա բնույթից եւ բարձրությունից: Բարձրաձայն, երկարատեւ աղմուկը մարդու մոտ կարող է մի շարք հիվանդությունների պատճառ հանդիսանալ՝ սրտանոթային եւ նյարդային համակարգից մինչեւ ստամոքսի խոց:
Ըստ մասնագետների, շատ կարեւոր հարց է մանկապարտեզների, դպրոցների, ուսումնական այլ հաստատությունների եւ հիվանդանոցների շրջակա աղմուկը: Որպեսզի երեխան մանկապարտեզում լիարժեք հանգստանա կամ անցկացնի արդյունավետ պարապմունքներ, դպրոցականը դասերին ուշադիր լինի եւ հիվանդը հիվանդանոցում հեշտ հաղթահարի հիվանդությունը, այդ պատճառով շրջակա աղմուկը պետք է հասցնել նվազագույնի: Լռության միջավայրում մարդ ավելի հեշտ է հանգստանում եւ կենտրոնանում:
Աղմուկից խուսափելու համար, որքան շատ նվազեցնեք ձեր շրջակա միջավայրի աղմուկը` դռներն ու պատուհաններն ավելի հերմետիկ լինեն, այնքան ավելորդ լարվածությունից զերծ կմնաք:
Բայց կան ձայներ, որոնք ոչ միայն չեն վնասում, այլ ընդհակառակը` թուլացնում, հանգստացնում են: Այդպիսի ձայները կոչվում են «սպիտակ» ձայներ: Դրանք բնության ձայներն են՝ ծփացող ալիքների, տերեւների խշխշոց, անձրեւի եւ առվակի ձայնը, գիշերային ձայները եւ այլն: Դրանք լսելով՝ մարդն իրեն ապահով եւ հանգիստ է զգում: «Սպիտակ» ձայները մարդու օրգանիզմը հանգստացնում, թուլացնում են: Եթե ձեզ անհրաժեշտ է թուլանալ, փախչել աղմուկից եւ հանգիստ քնել, ապա խորհուրդ է տրվում քնելուց առաջ կամ քնելու ընթացքում լսել բնության ձայներ:
Կարդացեք նաև
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
17.03.2015
