«Խորհրդարանական կառավարման համակարգում արագ որոշումներ ընդունելու դեպքում իսկապես վտանգ եմ տեսնում, բայց հենց Սահմանադրության մեջ պետք է այնպիսի դրույթներ նախատեսել, որոնք որոշակի դեպքերում թույլ կտան արագ որոշումներ կայացնել։ Մենք դա պետք է երաշխավորենք նոր Սահմանադրության մեջ։ Թե ով կլինի այդ որոշումը կայացնողը, դժվարանում եմ ասել»,- այսօր սահմանադրական բարեփոխումների թեմայով քննարկման ժամանակ ասաց ՀՀԿ-ական պատգամավոր Մանվել Բադեյանը։
Հիշեցնենք, որ քրիստոենաժողովրդավարական կուսակցության առաջնորդ Սոս Գիմիշյանն էլ ասել էր, որ խորհրդարանական կառավարման մոդելի անցումը խնդիրներ կառաջացնի օպերատիվ որոշումներ կայացնելու դեպքում:
Պարոն Բադեյանի համար էլ Կառավարման ցանկացած համակարգ խոցելի է, քննադատելի է, ունի իր թերություններն ու առավելությունները։
Նրա խոսքով՝ Սահմանադրական բարեփոխումների նոր նախագիծը կազմվելու է մասնագիտական խմբերի, քաղաքական ուժերի, Վենետիկի հանձնաժողովի համատեղ որոշմամբ եւ քննարկմամբ. «Մեր կյանքի մեծագույն փոփոխությունը կախված է Սահմանադրությունից։ Այսօր մենք ունենք մի մարդու Սահմանադրություն, դրա համար էլ այս վիճակում ենք։ Կարող է փոխենք ու նույնը ստանանք, կարող է՝ եւ ոչ։ Եկեք օբյեկտիվ Սահմանադրություն գրենք եւ ապահովենք մեր երկրի զարգացումը»։
Կարդացեք նաև
«Քրիստոնեա-ժողովրդական վերածնունդ» կուսակցության նախագահ Սոս Գիմիշյանն էլ պնդում է՝ սխալ է, որ Վենետիկի հանձնաժողովը պետք է հավանություն տա փոփոխությունների հայեցակարգին. «Դա նշանակում է, որ մեզ դրսից են ուղղորդում»:
Մանվել Բադեյանը դա ընդունված եւ օրինական համարեց. «Հիմա ինչ ասենք, պիտի ասեք՝ վա՞տ է»:
Իսկ երբ Սոս Գիմիշյանը ասաց՝ դեմ է սահմանադրական բարեփոխումներով կառավարման համակարգի փոփոխությանը, որովհետեւ պատճառներից մեկն էլ «անվստահելի իշխանությունն է», Մանվել Բադեյանը նշեց, որ նույն Ռուսաստանը մեծ ակնածանքով խոսում է Գերմանիայի կանցլեր Անգելա Մերկելի հետ.«Եթե քո երկիրը տնտեսական հզորություն կամ կշիռ չունի, ուզում ես նախագահ դիր անունը, ուզում ես սուպերնախագահ, ոչինչ չի փոխվելու»:
Արփինե ՍԻՄՈՆՅԱՆ
