Երեւանում ընթացող Եվրանեսթ Խորհրդարանական վեհաժողովում հավանական է, որ ընդունվի «Ուկրաինայի դեմ ՌԴ զինված ագրեսիայի և խաղաղ կարգավորման մասին» բանաձեւ: Բանաձեւը վեհաժողովի լիագումար նիստի ժամանակ ներկայացրեց վեհաժողովի համանախագահ Բոիս Տարասյուկը:
Բանաձեւը նվիրված է «Ուկրաինայի ժողովրդի դեմ ՌԴ վարած պատերազմին», որ մեկ տարուց ավելի է տեւում: Պատերազմի հետևանքով, ըստ բանախոսի, Դոնբասում մարդիկ զոհվում են, տառապում, ավելի քան 1.5 մլն բնակչություն տեղահանվել է, ենթակառուցվածքները ոչնչացվել են և դա Ուկրաինայի 20%-ից ավելի է: Բորիս Տարասյուկը նշեց, որ Ղրիմը ապօրինի կերպով միացվել է ՌԴ-ին, և հակազդեցության համար Ուկրաինայի իշխանության կողմից պահանջվում են ահռելի ջանքեր:
Բանախոսի խոսքով՝ միջազգային հանրությունը լուծումներ է փնտրում, բայց հրադադարի մասին թե անցած տարվա, թե սեպտեմբերին՝ Մինսկում կնքված համաձայնագրերը ՌԴ-ն շարունակում է խախտել: Նա հորդորեց Ռուսաստանին՝ հանել զորքերը Ուկրաինայից և նպաստել խաղաղությանը:
Նելլի ԳՐԻԳՈՐՅԱՆ
