Ռուսաստանը պատասխանել է վարորդական իրավունքում ծննդավայրը Լեռնային Ղարաբաղ նշելու վերաբերյալ Ադրբեջանի հարցմանը: Սոցիալական ցանցերում տեղեկություններ են հայտնվել այն մասին, որ Ռուսաստանում Էմիլ Արզանգուլյանին տրված վարորդական վկայականում որպես ծննդավայր նշված է Լեռնային Ղարաբաղ: Այս մասին հաղորդում է ադրբեջանական «Trend» գործակալությունը:
Այս կապակցությամբ Ռուսաստանում Ադրբեջանի դեսպանատանը հանձնարարվել է դիմել ՌԴ արտաքին գործերի եւ ներքին գործերի նախարարություններին: «Ռուսաստանի ԱԳՆ-ից ուղարկված պատասխան նոտայում ասվում է, որ Ռուսաստանը հարգում է Ադրբեջանի տարածքային ամբողջականությունը եւ ցուցաբերում է անփոփոխ նվիրվածություն այն պարտավորություններին, որոնք ստանձնել է հակամարտության կարգավորման գործում: Ընդգծվում է, որ սոցցանցերում Արզագուլյանի տարածած տեղեկատվությունը որեւէ առնչություն չունի այս հարցով Ռուսաստանի դիրքորոշման հետ»,- ասել է Ադրբեջանի ԱԳՆ մամուլի ծառայության ղեկավար Հիմքեթ Հաջիեւը:
Նրա խոսքերով՝ նոտայում նաեւ ասվում է, որ 2008 թվականի մայիսի 13-ին Ռուսաստանի ՆԳՆ կողմից տրված N 365 հրամանի համաձայն վարորդական իրավունքների տրամադրման եւ ձեւակերպման ժամանակ ծննդավայրը նշվում է վարչական-տարածքային միավորի ամբողջական անվանումը: «Նոտայում նաեւ նշվում է, որ հաշվի առնելով, որ Արզանգուլյանը ծնվել է Ադրբեջանի Սովետական Սոցիալիստական Հանրապետության Լեռնային Ղարաբաղի Ինքնավար Մարզում, նրա վարորդական իրավունքում նշված Լեռնային Ղարաբաղը ենթադրում է ԱՍՍՀ ԼՂԻՄ»,- ավելացրել է պաշտոնյան:
Պատրաստեց Աշոտ ԻՍՐԱԵԼՅԱՆԸ
