Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր ավարտվեց ճանաչված երաժիշտ Արտյոմ Լալայանի դեմ հարուցված քրեական գործով դատաքննությունը: Մեղադրող Աբրահամյանը մարտի 27-ին հանդես կգա մեղադրական ճառով:
Արտյոմ Լալայանը, որը մեղադրվում է դանակահարության համար, այսօր ընդամենը մի ցանկություն հայտնեց՝ «շուտ ուզում եմ ազատություն», իսկ նրա պաշտպան Սամվել Հովհաննիսյանը հայտնեց, որ գլխավոր դատախազությունը խոչընդոտել է Հատուկ քննչական ծառայությանը՝ չպարզելով, թե ում ստորագրությունն է դրվել Արտյոմ Լալայանի փոխարեն, ինչպես նաեւ չի հարուցել քրեական գործ: Ավելին, Սամվել Հովհաննիսյանը հայտարարեց, որ ինքը բողոքարկելու է գլխավոր դատախազին:
Մեր նախորդ հրապարակման մեջ նշել էինք, թե ինչ հիմքերով է մերժել գլխավոր դատախազությունը պաշտպանի միջնորդությունը՝ քրեական գործ հարուցել քննիչ դեմ: Ըստ պաշտպանի, եթե «սխալ» էր իր միջնորդությունը, ապա ինչո՞ւ էր գլխավոր դատախազությունը այն ուղարկում ՀՔԾ:
Իր հերթին, գլխավոր դատախազության որոշման հետ կապված, արձագանքեց նաեւ դատավոր Արշակ Վարդանյանը, որը շեշտեց, որ պատշաճ ընթացակարգի սահմաններում է դիմումն ուղարկվել գլխավոր դատախազություն, քանի որ դատարանը կայացրել է նաեւ արձանագրային որոշում: Նա զարմանքի ձեւով արտահայտվեց, թե մնում էր պաշտպանին զգուշացնեին սուտ ցուցմունք տալու համար: Նշենք, որ գլխավոր դատախազությունը իր որոշումը հիմնավորել էր նրանով, թե պաշտպանը չի նախազգուշացվել ակնհայտ սուտ ցուցմունք տալու համար, իսկ դատարանն էլ չպետք է պաշտպանի միջնորդությունը ուղարկեր գլխավոր դատախազություն:
Կարդացեք նաև
Մեղադրողը մի քանի հարց ուներ ամբաստանյալին: Նրան հետաքրքրում էր, թե 2012թ. օգոստոսին, դեպքի օրը արդյո՞ք երաժիշտը պատվիրել է օղի, քանի որ, ըստ վկաներից մեկի, օղու շիշ երաժշտական ակումբում կարող էր բերվել միայն տնօրենի՝ Ա. Լալայանի թույլտվությամբ: Ա. Լալայանը մեկ անգամ եւս պնդեց, որ ընդհանրապես օղի չի օգտագործում, եւ որ օղու շիշ չի եղել: Իսկ ինչ վերաբերում էր կոնսերվատորիայից ուղարկված 18 էջանոց փաստաթղթերի փաթեթին, ապա պարզվեց, որ 1989թ. կոնսերվատորիա ընդունվելիս նրանք, ովքեր հայերեն չեն իմացել, գրավոր քննություն են հանձնել ռուսերեն լեզվից եւ գրականությունից: Ստեփանակերտի Սայաթ-Նովայի երաժշտական դպրոցում հայերեն չի դասավանդվել, եւ, ըստ էության, Լալայանը քննությունն է հանձնել ռուսերեն: Ռուսերեն-հայերենի իմացությունը շեշտվում էր միայն նրա համար, որ Ա. Լալայանից, որը չի տիրապետում հայերենին, կեղծ ապացույցներ են կորզվել:
Ռուզան ՄԻՆԱՍՅԱՆ
