Նորվեգիայի վարչապետ Էռնա Սոլբերգը հայտարարել էր, որ ներկա չի գտնվելու Հայոց ցեղասպանության 100-րդ տարելիցի ոգեկոչման արարողությանը, քանի որ կարեւորում է Թուրքիայի եւ Նորվեգիայի հարաբերությունները: Ոգեկոչման արարողությանը մասնակցելու է դեսպանը:
Այս մասին Aravot.am-ը զրուցեց թուրքագետ Ռուբեն Մելքոնյանի հետ: Նա ասաց, որ քանիցս համոզվել ենք, որ Հայոց ցեղասպանության խնդրի համատեքստում բախվում են ռեալ քաղաքական շահերը եւ համամարդկային բարոյական չափանիշները: Սակայն, հաճախ գերիշխում են կամ հաղթող են դուրս գալիս ռեալ քաղաքական շահերը:
«Բնական է, որ 100-րդ տարելիցի եւ ապրիլի 24-ի միջոցառումներին ընդառաջ Թուրքիան փորձելու է էլ ավելի շեշտել իր աշխարհաքաղաքական կարեւորությունը տարբեր ոճերով, հատկապես՝ արեւելյան ոճով կաշառել եւ շահագրգռել տարբեր պետություններին, միջազգային կազմակերպություններին, որպեսզի չմասնակցեն Հայաստանում տեղի ունեցող միջոցառումներին կամ մասնակցեն Դարդանելի ճակատամարտի 100-ամյակին, սա բնական է: Ցավալի է, որ Նորվեգիայի պես բարեկեցիկ եւ չեզոք երկիրը կարող է տրվել Թուրքիայի նման խարդավանքներին: Այս պարագայում Նորվեգիայի համար հաղթեցին ռեալ քաղաքական շահերը, եւ ցավոք սրտի, նորվեգական ժողովրդավարության համար մի բավական վատ խարան դրվեց, որովհետեւ ըստ էության, նրանք հետընթաց քայլ կատարեցին՝ բարոյական չափանիշների առումով»,- ասաց նա:
Ամի ՉԻՉԱԿՅԱՆ
