Դատական դեպարտամենտի նախկին պետ Միսակ Մարտիրոսյանի եւ մյուսների գործի դատաքննությունն ավարտվեց:
Մարտի 30-ին սպասվում են մեղադրական ու պաշտպանական ճառերը:
Մինչ դատաքննությունը դատավոր Արշակ Վարդանյանը կհամարեր ավարտված, Միսակ Մարտիրոսյանը հանդես եկավ «Քրեական գործ հարուցելու նպատակով ՀՀ գլխավոր դատախազին համապատասխան միջնորդությամբ դիմելու մասին» միջնորդությամբ:
Միսակ Մարտիրոսյանն ասաց, որ բազմաթիվ անգամներ նշել է նախաքննության մարմնի եւ հսկող դատախազի կողմից կատարված հակաօրինական արարքների մասին:
Կարդացեք նաև
«16.02.2015 դատարանը համապատասխան գրությամբ դիմել էր գլխավոր դատախազին: 09.03.2015թ.դատաքննության ընթացքում դատարանը հրապարակեց ՀՀ գլխավոր դատախազության պատասխանը, որի համաձայն, կրկին ընտրվել է հարցին լուծում չտալու դասական ձեւը՝ դիմումը վերադարձվել է դատարանին ձեւական պատճառաբանությամբ, թե գրության վերնագիրը չի գրվել միջնորդություն, եւ ես չեմ նախազգուշացվել ակնհայտ սուտ ցուցմունք մատնություն կատարելու համար քրեական պատասխանատվության մասին»,-ասաց Մ.Մարտիրոսյանը:
Միսակ Մարտիրոսյանը հայտնեց, որ ուսուցչուհի Ռուզաննա Դարբինյանը՝ վկան, մուտք է գործել ՀՀ ոստիկանության ԿՀԴՊ գլխավոր վարչություն 2013թ.սեպտեմբերի 23-ին, ժամը 11.55-ին, եւ այնտեղ է գտնվել մինչեւ նույն օրվա ժամը 12.30-ը:
Նա հանդես է եկել կաշառք վերցնելու մասին հայտարարությամբ, որից հետո նույն վարչության նախապատրաստված նյութերը ըստ ենթակայության ուղարկելու մասին որոշում է կայացվել, ուղարկվել Երեւանի քննչական վարչություն:
«Այս ամենին չէինք անդրադառնա, եթե չլիներ մի շատ կարեւոր փաստ, որը կայանում է նրանում, որ 2013թ.սեպտեմբերի 23-ին ժամը 12-ից հետո տրված հայտարարության հիման վրա նախապատրաստվող նյութերով , արդեն դրանից տաս ժամ առաջ քննչական գործողություններ են կատարվում, հարցաքննվում են մարդիկ»,- շարունակեց Միսակ Մարտիրոսյանը:
Ըստ նրա՝ քննչական գործողություններ են կատարվել վկա Լիա Պետրոսյանի, Անգին Ղուկասյանի… հետ էլ:
Միսակ Մարտիրոսյանը հայտարարեց, որ քննիչի նշյալ որոշումը դատախազի կողմից չի վերացվել:
Խոսքը վկա Ռուզաննա Դարբինյանի նկատմամբ քրեական հետապնդվում չիրականացնելու մասին է՝ 2014թ.ապրիլի 25-ի:
Միսակ Մարտիրոսյանը իր միջնորդության մեջ նաեւ նշել էր.«Բացի այդ Ռուզաննա Դարբինյանից հանցագործության մասին հաղորդում ընդունելուց հետո ՀՀ ոստիկանության ԿՀԴՊ ԳՎ պետը հաղորդագրություն է տարածել կաշառք տալու եւ «ստանալու» վերաբերյալ, որում նշել էր, որ Ռուզաննա Դարբինյանն իր վերոնշյալ հայտարարությունը տվել է իրենց մոտ ստացված օպերատիվ տվյալներն իրացնելիս»:
Ըստ Մ.Մարիտիրոսյանի՝ նշյալ հաղորդագրության մի մասը հաստատ վրիպակ չի, քանի որ ապագա վկան հայտնել էր, որ հրավիրվել է ոստիկանություն, եւ այնտեղ հայտնել է 1000 դոլար կաշառք տալու մասին:
Մ.Մարտիրոսյանը չորրորդ անգամ միջնորդեց, որ ասվածը դիտվի հաղորդում հանցագործության մասին, խնդրեց դատարանին այս անգամ իրեն զգուշացնել ակնհայտ ստոր մատնության վերաբերյալ:
Մեղադրող Սասուն Խաչատրյանն ասաց, որ բարձրացված հարցերը կարգապահական խախտման հարցեր են, իսկ դատավոր Արշակ Վարդանյանը մերժեց այն, պատճառաբանելով, որ դատարանը պատշաճ ընթացակարգով է ուղարկել Մարտիրոսյանի հաղորդումը, դրանում մեջբերվածի հիմնավորվածությունը որոշելն էլ իր՝ նախագահողի գործը չի:
Ռուզան ՄԻՆԱՍՅԱՆ
