Մարտի 7-ին Գյումրու Արցախ թաղամասում «Պեգաս» խանութի մոտ Ղազարյան ու Ղուկասյան ընտանիքների տղամարդկանց միջեւ տեղի ունեցած վիճաբանության, այնուհետ հնչած կրակոցների պատճառով մարմնական ծանր վնասվածքներ ստացած 7 հոգուց մեկը մահացել էր «Էրեբուն»-ի բժշկական կենտրոնում:
Գանգուղեղային հրազենային- կոտորակային բաց վնասվածքից մահացած 36-ամյա Կնյազ Ղազարյանը երեք երեխաների հայր է, ընդ որում նրա ամենափոքր երեխան 6 ամսական է, մյուսները 9 ու 7 տարեկան:
Նշենք, որ մարզի իրավապահների ասելով, այս երկու ընտանիքները երբևէ չեն հայտնվել իրավապահների ուշադրության կենտրոնում, նրանք բավական հեռու են եղել նման կարգի պատմություններից, ուստիև բոլորին ապշեցրել է այս ձևով հարցեր լուծելը:
Հիշեցնենք, որ, ըստ քննչական կոմիտե տարածած վերջին հաղորդագրության, Գյումրիում մարտի 7-ին տեղի ունեցած զինված միջադեպի գործով 2 անձ ձերբակալվել է, եւս երեքի նկատմամբ հայտարարվել հետախուզում: «Մարտի 7-ին՝ ժամը 22։30-ի սահմաններում, Գյումրիի Մյասնիկյան փողոցում մի խումբ անձանց հետ բռնությամբ զուգորդված խուլիգանություն կատարելու կասկածանքով ձերբակալվել են Գյումրի քաղաքի բնակիչներ Հովհաննես Տոնոյանը եւ Համլետ Գեւորգյանը։
Կարդացեք նաև
Նախաքննությամբ ձեռք բերված ապացույցների համակցությամբ մարտի 11-ին որոշում է կայացվել բռնության գործադրմամբ խուլիգանություն կատարելու համար Գյումրի քաղաքի բնակիչ Փայլակ Առաքելյանին որպես մեղադրյալ ներգրավելու մասին։ Նրա նկատմամբ որպես խափանման միջոց է ընտրվել կալանավորումը եւ հայտարարվել հետախուզում։
Հիշեցնենք, որ մարտի 10-ին որոշում է կայացվել Գյումրի քաղաքի բնակիչներ Գրիգորյան եղբայրներին որպես մեղադրյալ ներգրավելու մասին։
Ա.Գրիգորյանը մեղադրվում է երկու և ավելի անձանց նկատմամբ սպանության փորձ կատարելու, իսկ Գ.Գրիգորյանը՝ ապօրինի ձեռք բերած և կրած հրազենի գործադրմամբ խուլիգանություն կատարելու մեջ»։
Գրիգորյան եղբայրները «մենամարտող» կողմերից մեկի՝ Արցախ թաղամասի բնակիչ Գագիկ Ղուկասյանի որդիներն են:
Գյումրու բժշկական կենտրոնի փոխտնօրեն Արմեն Խաչատրյանը մեզ փոխանցեց, որ իրենց մոտ գտնվող 3 անձանցից երկուսը՝ Սմբատ Ղազարյանը ու Գագիկ Ջանոյանը դուրս են գրվել արդեն, մնացել է միայն մեկը՝ 35-ամյա Վլադիմիր Հակոբյանը, որը ստացել էր ձախ գոտկային հատվածում թափանցող ծագած -կտրած վնասվածք , ինչպես նաև վնասվածք ձախ ազդրի շրջանում:
Վերջինիս վիճակը գնահատվում է բավարար:
Նունե ԱՐԵՎՇԱՏՅԱՆ
