Մարտի 15-ը սպառողների իրավունքների պաշտպանության միջազգային օրն է։ Իսկ արդյո՞ք հայ սպառողների իրավունքները լավ են պաշտպանված։ Հարցի շուրջ այսօր «Հայացք» մամուլի ակումբում Սպառողների խորհրդատվություն կենտրոնի նախագահ Կարեն Չիլինգարյանը տեսակետ հայտնեց, որ չնայած Հայաստանում գործում է սպառողների իրավունքների պաշտպանության մասին օրենքը, որում լավ դրույթներ կան, սակայն մեր երկրում դրանց մեծ մասը շրջանցվում են։
«Մեր սպառողների իրավունքները պաշտպանող կոնկրետ կառույց չկա, չկա թեժ գիծ, որտեղ սպառողը կդիմի իրեն հուզող հարցերի համար, սպառողի իրավունքը արդյունավետ կերպով չի պաշտպանվում մեր երկրում»,-վստահ է պրն Չիլինգարյանը։
Հոգեբան Ռուբեն Աղուզումցյանն էլ խնդրին անդրադառնալով հոգեբանական տեսանկյունից, նշեց, որ սպառողի հոգեբանությունը շատ լայն է. «Յուրաքանչյուր անձ սպառող է եւ սպառողների իրավունքները պետք է պաշտպանվեն, ամենաառաջինը, հենց սպառողների կողմից, քանի որ պետությունը չի կարող բոլոր հիմնարկներում՝ սկսած կրպակներից, մինչեւ մեծ սուպերմարկետներ, հսկողություն իրականացնել»։
Հոգեբանի համոզմամբ՝ հայ սպառողն այդպես չի անում մի քանի պատճառներով. «Մենք բավականին հաճախ կարծրատիպերով ենք գործում, մենք գնում ենք ոչ թե ըստ պահանջի, այլ քանի որ այդպես է ընդունված մեր շրջապատում՝ ուրիշն ունի, իսկ ես ՝ ոչ։
Կարդացեք նաև
Մեզ նաեւ փոքր հասակից չենք դաստիարակում ինչպես ճիշտ ծախսել փողը եւ շատ հաճախ փողը ծախսում ենք անմիտ։ Դա հանգեցնում է անախորժությունների»։ Հոգեբանը օրինակ է բերում, որ շատերը վարկ են վերցնում հարսանիք կազմակերպելու համար. «Նման հոգեբանական ոչ ճիշտ մոտեցումը վատ հետեւանքների է հանգեցնում՝ տուն են վաճառում, պարտքերի տակ են ընկնում։ Հայ սպառողը չգիտի, թե ինչպես ծախսել իր գումարը»։
Այս ամենը տնտեսական գիտակցության հարցեր են, որոնք, ըստ բանախոսի, հայ սպառողի մոտ այդքան էլ զարգացած չեն։
էլյա ՀՈՎՀԱՆՆԻՍՅԱՆ
