«Բավականին քննարկել ենք, խոսել ենք, ու հայեցակարգի վերաբերյալ մենք մեր նախկին տեսակետը վերահաստատել ենք: Ասացինք, թե նախկինում ինչո՞ւ էինք դեմ, եւ մեր բոլոր անհանգստությունները հայտնեցինք: Պայմանավորվեցինք անհրաժեշտության դեպքում էլի քննարկել»,- «Առավոտի» հետ զրույցում նախագահի մոտ սահմանադրական բարեփոխումների հայեցակարգի մասին քննարկումից մանրամասներ ներկայացրեց ԲՀԿ-ական պատգամավոր Ստեփան Մարգարյանը:
«Առավոտի» տեղեկություններով՝ նախագահի հանդիպումները քաղաքական ուժերի ներկայացուցիչների հետ բավական բարիդրացիական մթնոլորտում են եղել: Սերժ Սարգսյանը պարտադրողական դիրքերից հանդես չի եկել: «Ես ենթադրում եմ, որ նախագահը լսում էր քաղաքական ուժերին՝ անշուշտ, իր կարծիքը ամբողջացնելու համար»,- ասաց Ստեփան Մարգարյանը ի պատասխան հարցի՝ հնարավո՞ր է քաղաքական ուժերի բացասական վերաբերմունքն այս փոփոխություններին ստիպի նախագահին վերանայել իր մոտեցումը եւ օրակարգից հանել սահմանադրական բարեփոխումները կամ գոնե խորհրդարանական համակարգին անցումը: «Ապագայում ի՞նչ կլինի՝ կտեսնենք: Հանձնաժողով կա… հիմա այլ բան չենք խոսել, այլ բան չեմ կարող ասել»,- ասաց նա:
