Ժառանգություն կուսակցության վարչության անդամները շարունակում են մեկը մյուսից տարբեր, հակասական տեսակետներ հայտնել Բաղրամյան 26-ի հայտնի հանդիպման մասին:
Ինչպես տեղեկացրել ենք, Սերժ Սարգսյանը Սահմանադրական փոփոխությունների հարցը քննարկելու համար հրավիրել է մի շարք կուսակցությունների, այդ թվում՝ Ժառանգությանը: Կուսակցությունից հանդիպմանը գնացել են Արմեն Մարտիրոսյանն ու Ռուբեն Հակոբյանը: Վերջիններս պնդում են, որ կուսակցության վարչության խորհրդակցության ժամանակ անդամները որոշել են, որ պետք է ընդունեն Սերժ Սարգսյանի հրավերը եւ քննարկեն իրենց առաջարկները նրա հետ: Րաֆֆի Հովհաննիսյանն էլ տվել է իր համաձայնությունը:
Սակայն կուսակցության վարչության որոշ անդամներ վստահեցնում են, որ նման որոշում վարչությունը չի կայացրել եւ Արմեն Մարտիրոսյանն ու Ռուբեն Հակոբյանը Բաղրամյան 26 են գնացել սեփական նախաձեռնությամբ՝ որպես անհատներ՝ չներկայացնելով Ժառանգությունը:
Այս առնչությամբ Aravot.am-ը զրուցեց կուսակցության վարչության անդամ Անդրանիկ Գրիգորյանի հետ: Նրա խոսքերով՝ «Վերջին խորհրդակցությանը ես ներկա չեմ եղել, որովհետեւ պարոն Հովհաննիսյանից թույլտվություն էի ստացել անձնական խնդիրներով զբաղվել: Ինչ վերաբերում է Սերժ Սարգսյանի հետ հանդիպմանը, քաղաքականության մեջ ոչինչ բացառել չի կարելի: Քաղաքականությունն ինքը ենթադրում է նման հանդիպումների հնարավորություն: Ես դրան սովորական եմ վերաբերվում: Ինքս հավատում եմ Արմեն Մարտիրոսյանի կուսակցական կարգապահությանը, որովհետեւ բազմիցս դրան ականատես եմ եղել»:
Կարդացեք նաև
Մեր հարցին՝ Դուք տեղյա՞կ եք, վարչության անդամների հետ խորհրդակցության ժամանակ լուրջ տարաձայնություններ չե՞ն եղել Բաղրամյան 26 գնալու հետ կապված՝ Անդրանիկ Գրիգորյանը պատասխանեց. «Իմ կարծիքով, ներկա քաղաքական դաշտում ինչ-որ բան փոխելու համար կարելի է հանդիպել թե՛ Սերժ Սարգսյանի,թե՛ հրեշտակապետի կամ սատանայապետի, բոլորի հետ: Տիկին Փոստանջյանը պիտի իմանա, որ քաղաքականության մեջ ոչինչ ու երբեք չի կարելի բացառել: Իսկ այդ խորհրդակցության տարաձայնությունների ու բանավեճին ներկա չեմ եղել եւ ինձ իրավունք չեմ վերապահում խոսել այդ մասին»:
Նշենք, որ Բաղրամյան 26-ի հանդիպմանը կոշտ էր արձագանքել հատկապես զարուհի Փոստանջյանը, որը Lragir.am-ի հետ զրույցում հանդիպմանը մասնակցող գործիչներին Բաղրամյան 26-ի հաճախորդներ էր անվանել:
Հռիփսիմե ՋԵԲԵՋՅԱՆ
Երևի արդեն ժամանակն է,որ Զարուհի Փոստանջյանը դուրս գա «Ժառանգությունից» (և միանա Ն.Փաշինյանին):
Զարուհին շատ ճիշտ է ասել…