«Ամենասկզբից կառավարման մոդելի կողմնակիցն եմ եղել, բայց հիմա ապշած եմ՝ ինչպես կարող է մեծամասնությունը, որ դեմ էր այդ գործընթացին, Ազատության հրապարակի խայտառակ բեմականացումից հետո գնում, ասում են՝ այո համաձայն ենք փոփոխությունների: Ես կողմ եմ, որ քաղաքական ուժերը մասնակցեն քննարկումներին, երկխոսությանը, բայց չեմ գտնում, որ դա պետք է արվեր այսպիսի զիգզագների ու նվաստացումների գնով, նայում են, թե ինչ է ասում իշխանությունն, ու ինչ է ուզում նախագահը: Բոլոը նայում են, թե ինչ է իրենց զիջվելու, եթե գնան այդ բարեփոխումներին»,-այսօր «Դեբատ» ակումբում անդրադառնալով քաղաքական ուժերի ներկայացուցիչների ու Սերժ Սարգսյանի հանդիպումներին՝ ասաց Միջազգային և անվտանգության հարցերի հայկական ինստիտուտի տնօրեն Ստյոպա Սաֆարյանը:
Նրա դիտարկմամբ, շատ հետաքրքիր շրջան է հիմա սկսվել, մեկ տարի է անցել մի շարժումից, որի սաղմերը դրվեցին նախորդ տարվա ձմռանը. «Նկատի ունեմ եռյակ, քառյակ, այդ գործընթացի սկիզբը, հետո լուծարումը: Ապրիլի երեքին վարչապետափոխություն եղավ: Ակնհայտ էր՝ անցած տարի ընդդիմությունն անկեղծ չէր հասարակության հետ՝ ասելով, թե վարչապետն իր պատճառով է փոխվել: Իրականում Սերժ Սարգսյանը ԲՀԿ-ի համակրանքը շահելու համար էր փոխել, քանի որ ԲՀԿ-ն այլ ճանապարհով գնաց, որոշեց չեղյալ համարել իր բոլոր պայմանավորվածությունները»:
Արփինե ՍԻՄՈՆՅԱՆ
