Մարտի 8-11-ը ԱԺ փոխնախագահ Էդուարդ Շարմազանովի գլխավորությամբ ԱԺ պատվիրակությունն այցելել է Չեխիայի Հանրապետություն: Պատվիրակության կազմում է եղել նաեւ աշխատակազմի ղեկավար Հրայր Թովմասյանը:
Չեխիայում հայ պատվիրակությունը միջոցառումներ է կազմակերպել եւ քննարկել Հայոց ցեղասպանության ճանաչման հարցը: Այսօր այդ մասին հրավիրած ասուլիսում ՀՅԴ խմբակցության պատգամավոր Արծվիկ Մինասյանն ասաց, որ Չեխիայի երաժշտության թանգարանում ցուցադրություն է կազմակերպվել, որտեղ ներկայացրել են միջազգային մամուլի հրապարակումները, քաղաքական, հասարակական գործիչների դատապարտումները. «Պրագայի հոգեւոր առաջնորդն էր ներկա, սա հաջողված ցուցադրություն էր, շատ բան էր կախված այդ հաջողությունից»:
Այդ օրերին Չեխիայում կազմակերպվել է գիտական կոնֆերանս, որին հրավիրված է եղել նաեւ Էդուարդ Շարմազանովը: ԱԺ փոխխոսնակը առիթը բաց չի թողել եւ իր ելույթում խոսել է ցեղասպանության եւ դրա հետեւանքների մասին, որ քանի դեռ թուրքական մերժողականությունը շարունակվում է, ցեղասպանության կրկնողությունը չի բացառվում՝ այլ երկրների նկատմամբ: Արծվիկ Մինասյանի խոսքերով՝ Շարմազանովի ելույթում մեղադրանքներ կային այն երկրների նկատմամբ, առաջին հերթին՝ Թուրքիայի, որոնք մերժողական քաղաքականություն են որդեգրել:
Գիտաժողովին ներկա է եղել նաեւ Թուրքիայի դեսպանը եւ լսելով Շարմազանովի ելույթը, ողջ գիտաժողովի ընթացում ձայն է խնդրել, որ ելույթով հանդես գա, չի հաջողվել: Շարմազանովի ելույթից հետո հայկական կպատվիրակությունը դուրս է եկել: Իսկ թուրքական կողմը միայն նշումներ է փոխանցել, որոնք,Արծվիկ Մինասյանի գնահատմամբ, եղել են պարկեշտության սահմաններում:
Կարդացեք նաև
Մեր հարցին՝ ինչո՞ւ եք դուրս եկել գիտաժողովից, այդպիսի կեցվա՞ծք եք որոշել ընդունել, որ մենք մեր ասելիքն ասացինք ու գնանք, Արծվիկ Մինասյանը պատասխանեց, որ դա եղել է գիտաժողով, որից հայկական կողմն օգտվել է եւ չեն ցանկացել, որ արձագաքներ լինեն, թե քաղաքական ակցիա են իրականացնում:
Արծվիկ Մինասյանը պատմեց, որ չեխական կողմից մի պաշտոնյա ասել է՝ հայերը լավ լոբբինգ են անում աշխարհով մեկ եւ բնական է, որ պետք է շատ երկրներ ճանաչեն Հայոց ցեղասպանությունը. «Մենք էլ ասացինք, որ աշխարհում չկա մի պետություն, որի բնակչության ընդամենը 30 տոկոսը բնակվի իր երկրում, իսկ դա ցեղասպանության հետեւանք է»:
Հարցին՝ հնարավո՞ր է Չեխիան մինչեւ 100-ամյակը ճանաչի Հայոց ցեղասպանությունը՝ Արծվիկ Մինասյանը պատասխանեց, որ քիչ հավանական է, բայց Չեխիայի հասարակությունը ներգրավված է խնդրում, որոշակի հարմար պահ կամ առիթ է պետք, որպեսզի ընթացք կարողանան տալ: Շատ կարեւոր է, որ ոչ թե լինի ձեւական ճանաչումը, այլ լինի մեր պահանջատիրությունը:
Լրագրողների հարցին՝ ձեւական չե՞ն այդ ցուցադրությունները, եթե չպետք է լինի ճանաչումը՝ Արծվիկ Մինասյանը չհամաձայնեց, ասելով՝ դուք միանգամից ուզում եք, որ Արեւմտյան Հայաստանը բերեն հանձնեն մե՞զ:
Հռիփսիմե ՋԵԲԵՋՅԱՆ
