Նուշը, շնորհիվ մեծ քանակությամբ ճարպերի, ազոտային նյութերի, շատ սննդարար է շաքարային դիաբետով հիվանդ մարդկանց համար: Այն խորհուրդ է տրվում նաեւ միս չօգտագործողներին:
Նշի օգտակարությունը եւ բուժական հատկությունները մարդկությանը հայտնի են հնուց ի վեր: Այն օգտակար է չոր հազի, արյունաթքության, միզապարկի եւ աղիների հիվանդությունների դեպքում։ Մաքրում է կուրծքը եւ հանգստացնում միզելու ժամանակ առաջացած մրմռոցը։ Շաքարի հետ ուտելու դեպքում առատացնում է սերմնարտադրությունը, ինչպես նաեւ օգտակար է թոքերի համար։ Բոված նուշը, բացի այն, որ շատ համեղ է, օգտակար է նաեւ հենց ստամոքսի համար, որը, սակայն, դանդաղ է մարսվում։ Նշի յուղն օգնում է ականջի ցավի դեպքում։ Նշի վնասակար ներգործությունն այն է, որ չեզոքացնում է շաքարը, ինչպես նաեւ՝ թթու մրգերից պատրաստված օշարակի օգտակար ազդեցությունը։
Նշի յուղը օգտակար է մաշկին: Այն քսում են դեմքին՝ մաշկը թարմ պահելու համար: Նշի յուղը նաեւ վերացնում է պեպենները:
Դառը նուշը մաքրող հատկություն ունի, որը պզուկներին եւ էկզեմային քսելու դեպքում կբուժի դրանք: Նուշը լավացնում է տեսողությունը, իսկ կորիզների կեղեւի եփուկն իջեցնում է բարձր ջերմությունը, դադարեցնում լուծը: Եթե դուք գինի խմելուց հարբում եք, ապա խմելուց առաջ կերեք 5 հատ նուշ եւ այն չի թողնի, որ գինին ձեզ արբեցնի:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
10.03.2015
