Տնտեսագետ Բագրատ Ասատրյանի կանխատեսմամբ, այս տարի արձանագրվելու է 10% տնտեսական անկում, գնաճն էլ կկազմի՝ 8-10% :
Այսօր «Հայելի» ակումբում տնտեսագետն ասաց, որ անկում է սպասվում նաեւ Ներմուծման բնագավառում՝ 25 տոկոսով կրճատում է կանխատեսում, անկում կգրանցվի նաեւ արդյունաբերության, շինարարության, առեւտրի ոլորտներում. «Հաջորդ տարի էլ ենք տնտեսության անկման հետ գործ ունենալու»:
Բագրատ Ասատրյանի խոսքով, անցած տնտեսական տարին մի կերպ փակեցինք, տնտեսական աճ նկատվեց, բայց աճն էլ աճի նման չէր:
«Արտադրության աճի տեմպերը զրոյական են եղել, ներկրման աճն էլ է զրո եղել, միայն առեւտուրն ու սպասարկման ոլորտում է աճ գրանցվել, ինչը նշանակում է՝ կամ գուցե մեր իշխանությունները թասիբի ընկան ստվերից սկսեցին ամեն ինչ հրապարակ կամ մեր երկրում ոչինչ տեղի չի ունենում, բացի գրչությունից»:
Կարդացեք նաև
Տնտեսագետի կանխատեսումները չառարկեց ԱԺ ՀՀԿ խմբակցության պատգամավոր Արտակ Դավթյանը. «Մենք, տեսնելով այսօրվա թվերը, փորձենք տեսնել այն ճանապարհները, որով այդ թվերը կշտկվեն, իսկ կանխատեսել, թե ինչպիսին կլինեն իրողությունները, ճիշտ չէ: Մենք ընդունել ենք բյուջե ու բյուջեով նախատեսված ցուցանիշները իրողություն կդառնան, թե՝ոչ, ժամանակը ցույց կտա»:
Հետո ասաց, որ տնտեսագետը պարբերաբար նույն կանխատեսումներն է ներկայացնում, ինչը ընդունելի չէ: Բագրատ Ասատրյանն էլ շարունակեց. «Այնպես չէ, որ հաճախ եմ խոսել, ուզում էի իմ մտահոգությունները ներկայացնել: 2009-ին հայտարարեցի՝ երկնիշ տնտեսական անկում է լինելու, նույնիսկ ԱՄՀ-ի ներկայացուցիչը հետս կռիվ արեց, բայց եղավ: Պահանջարկի ճգնաժամ է լինելու, որովհետեւ ունենք գերմենաշնորհացված, գերկոռումպացված տնտեսական համակարգ, ամբողջովին պետք վերանայվի բյուջետային քաղաքականությունը, ծախսերը հիմնականում պետք է ուղղվեն այն ոլորտներում, որոնք ամենամեծ զբաղվածությունն են ապահովում՝ օրինակ շինարարության ոլորտ»:
Նրա խոսքով ահավոր վիճակ է նաեւ մասնավոր տրանսֆերտների բնագավառում. «Շատ ծանր է, 2014-ի մինչեւ առաջին կեսը տատանողական աճ կար, երկրորդ կեսից հետո ընդհանուր ծավալի կրճատում ենք ունեցել, իսկ այս տարեսկզբին արդեն անկում է նկատվում: Հունվարին ընդհանուր հոսքի 40 տոկոս անկում է արձանագրվել»:
Արտակ Դավթյանն էլ վկայակոչեց ԱՎԾ-ի տվյալները ու վստահեցրեց, որ պաշտոնական տվյալներն են վկայում, որ ունենք տնտեսական ակտիվություն՝ չնայած արտաքին ոչ բարենպաստ տնտեսական զարգացումների, ՌԴ-ում ստեղծված անբարենպաստ վիճակը, սանկցիաներ, ուկրաինական հարց. «Ռուսաստանում տնտեսական անկման ցուցանիշը կպահպանվի երկու-երեք տարի, իսկ Ռուսաստանի խնդիրները թե ինչ բացասական հետեւանքներ կունենա Հայաստանի վրա, կարծում եմ, որ ժամանակը ցույց կտա»:
Արփինե ՍԻՄՈՆՅԱՆ
