Ռուսաստանի նախագահ Վլադիմիր Պուտինը ստորագրել է «ՀՀ և ՌԴ կառավարությունների միջև ՌԴ տարածքում ՀՀ քաղաքացիների և ՀՀ տարածքում ՌԴ քաղաքացիների գտնվելու կարգի մասին» համաձայնագրի վավերացման մասին օրենքը:
Ռուսաստանի նախագահի կայքում հրապարակված հաղորդագրության համաձայն՝ օրենքը ընդունվել է Պետական Դումայի կողմից փետրվարի 20-ին եւ փետրվարի 25-ին հաստատվել է Դաշնային Խորհրդի կողմից: 2014 թվականի հուլիսի 11-ին Սոչիում ստորագրված համաձայնագիրը նախատեսում է երկու երկրների քաղաքացիների համար բարենպաստ պայմաններ ստեղծել Հայաստանում եւ Ռուսաստանում բնակվելու համար:
Համաձայնագրով սահմանվում է, որ Հայաստանի եւ Ռուսաստանի քաղաքացիները միմյանց երկրներ ժամանելուց հետո ազատվում են 30 օրվա ընթացքում իրավասու մարմիններում գրանցվելու պարտավորությունից: 30 օրը լրանալուց հետո, նրանք պարտավոր են իրավասու մարմիններում գրանցվել՝ այդ երկրի օրենսդրությանը համապատասխան:
Պատրաստեց Աշոտ ԻՍՐԱԵԼՅԱՆԸ
