Aravot.am-ը ՀՀ մշակույթի նախարարության պատմության եւ մշակույթի հուշարձանների պահպանության գործակալության պետ Արմեն Աբրոյանից հետաքրքրվեց՝ ի՞նչ միջոցներ են ձեռնարկել՝ կապված Երեւան-Սեւան մայրուղում գտնվող «Արձագանք» բրոնզաձույլ քանդակի վնասման հետ, որի հեղինակը Խաչատուր Հակոբյանն է:
Գործակալության պետն ասաց, որ արձանն իր իրավական կարգավիճակով հուշարձան չէ: «Մենք եւ մշակույթի նախարարությունը դատապարտում ենք եւ ցավով ենք վերաբերվում կատարվածին: Մշակույթի նախարարությունը միջոցներ է ձեռնարկել, դատախազությանն ենք գրել Կոտայքի մարզի, որպեսզի հանցանքը կանխվի եւ հետագա հնարավոր դեպքերը բացառվեն»,-նշեց մեր զրուցակիցը:
Արմեն Աբրոյանի ասելով, քանդակի մշակութային արժեք լինելը պետք է մասնագետները փաստեն, որպեսզի մշակույթի նախարարությունն այն իր պահպանության տակ վերցնի: Ամեն դեպքում, նրա խոսքով. «Տվյալ տարածքը տիրապետող Տեղական ինքնակառավարման մարմինը պետք է դրանով զբաղվի, որովհետեւ անկախ նրանից, վնասված քանդակը հուշարձան է, թե ոչ, կատարվածը հանցանք է, իսկ աշխարհում երբեք հանցանքները նախապես չեն կանխվում»:
Պատմության եւ մշակույթի հուշարձանների պահպանության գործակալության պետը համոզված է՝ բոլորը պետք է դրանով զբաղվեն՝ հասարակությունը, իրավապահ մարմինները, նախարարությունը, համայնքները եւ հատկապես մարզպետարանները, որպեսզի նման դեպքեր այլեւս չլինեն:
Կարդացեք նաև
Հետաքրքրվեցինք՝ անցյալ տարի ամբողջ Հայաստանի տարածքում պետական կարգավիճակ ունեցող քանի՞ հուշարձան է վնասվել: Արմեն Աբրոյանն ասաց, որ բազմաթիվ են եղել դեպքերը, փոքր վնասվածք ունեցող հուշարձանները արագ վերականգնվել են, ինչ վերաբերում է լուրջ վնասումներին, այդպիսի հուշարձանների թիվը 34-ն է: Ըստ մեր զրուցակցի, «Դրանք ներկայումս գտնվում են իրավապահ մարմինների՝ մի տեղ քննչական, մի տեղ՝ դատախազության, ոստիկանության ուշադրության ներքո, նույնիսկ հուշարձանի գործ կա, որ դատարանում է»:
Գոհար ՀԱԿՈԲՅԱՆ
Լուսանկարը՝ Գերման Ավագյանի
