«Պարզ երեւում է, որ ԲՀԿ-ն այն ուժը չի կարող ունենալ, ինչ մինչ այսօր ուներ: Ամենայն հավանականությամբ, նրանք տեղ կունենան իրենց համապատասխան ընդդիմադիր դաշտում: Ընդդիմությունը բոլոր ժամանակներում անհրաժեշտ է, առավել եւս այն ընդդիմությունը, որ դուշմանի նման չի, կառուցողական առաջարկներ է անում՝ երկրում անելիքների հետ կապված: Ընդդիմությունը լուրջ անելիք ունի»,- այսօր «Հայելի» ակումբում նման կարծիք հայտնեց ՀՀԿ պատգամավոր Մկրտիչ Մինասյանը: Նա վստահեցրեց, որ նորացված ԲՀԿ-ն իրենց ջրաղացին ջուր չի լցնելու:
Հարցին՝ հիմա, երբ Գագիկ Ծառուկյանը դուրս եկավ քաղաքական դաշտից, այլեւս դաշտը տգետներից մաքրվե՞ց՝ Մկրտիչ Մինասյանը վստահեցրեց, որ դա վերաբերում է բոլորին՝ ե՛ւ ընդդիմությանը, ե՛ւ իշխանությանը. «Բարեկրթություն պետք է լինի»:
Գուրգեն Եղիազարյանը վիճեց նրա հետ. «Խնդիրն այն է, որ ոչ ոք իրավունք չունի որոշի, թե ով պետք է լինի քաղաքականության մեջ, ով չպետք է լինի»:
«Ո՞նց իրավունք չունի, նա երկրի ղեկավարն է, ո՞նց չունի: Դու քո կարծիքն այստեղ իրավունք ունես ասելու, նա՝ չէ՞: Դա քո կարծիքն է»,- հակադարձեց Մկրտիչ Մինասյանը:
Կարդացեք նաև
Գուրգեն Եղիազարյանը չհամաձայնեց՝ նա թող ասի ձեզ, իր թիմում, բայց ոչ նման հայտարարություն անի ու որոշի. «Հանցագործը, կրկնահանցագործը կարող է քաղաքականությամբ զբաղվի, իսկ մարդը, որը չի կարդացել «Վարդանանքը», չպիտի՞ զբաղվի: Հիմա մարդուն նորից ասում եք՝ պարոն Ծառուկյան: Ասենք, Կենտրոնն էլ փակեցիք, էլ ոչ մի բանի մասին ցույց չի տա, հետո՞»:
Մկրտիչ Մինասյանի խոսքերով՝ «Կենտրոնը» փակված չի, գործում է:
Հարցին՝ որո՞նք են չափանիշները, ո՞վ պետք է զբաղվի քաղաքականությամբ, ո՞վ է դրան առավել համապատասխանում՝ Մհեր Սեդրակյանը, Առաքել Մովսիսյանը, Սամվել Ալեքսանյանը՝ Մկրտիչ Մինասյանը պատասխանեց, որ եթե դուք անուններ տվեցիք, այդ նույն տիպի անուններ ԲՀԿ-ում էլ կան: Չափանիշները գործում են բոլորի համար:
Ըստ Գուրգեն Եղիազարյանի, ԲՀԿ-ն այս ամեն ինչից դուրս կգա մաքրված, պարզված. «Ինձ չի թվում, որ նրանք կլինեն գրպանային ընդդիմություն: Նրանք իրոք կլինեն ընդդիմություն»:
Հռիփսիմե ՋԵԲԵՋՅԱՆ
