Գյումրու բժշկական կենտրոնի փոխտնօրեն Արմեն Խաչատրյանը Aravot.am-ին տեղեկացրեց, որ այսօր առավոտյան ժամը 6-ին Գյումրու բժշկական կենտրոն է ներկայացել 1980 թվականի Ջանոյան Գագիկը, որը ստացել է գանգուղեղային վնասվածք, դեմքի փափուկ հյուսվածքների սալջարդ: Վերջինս նույնպես Գյումրու Արցախ թաղամասում հնչած կրակոցների մասնակից է, նրանց թիվը այսօր դարձավ 7:
Ըստ Արմեն Խաչատրյանի տվյալների, այս միջադեպի մասնակից Կնյազ Ղազարյանը ստացել է գանգուղեղային հրազենային- կոտորակային բաց վնասվածք: Վերջինիս եղբայրը՝ Գագիկ Ղազարյանը, ստացել է ձախ ուսահոդի շրջանի հրազենային –կոտորակային վնասվածք, անրակի կոտրվածք ու քերծվածքներ՝ գլխի գագաթային և ծոծրակային հատվածում:
Այս երկու եղբայրներին, ինչպես նաև Արցախ թաղամասի բնակիչ Գագիկ Ղուկասյանին՝ Կոկոլի Գագոյին, տեղափոխել են Երևան «Էրեբուն»-ի բժշկական կենտրոն: Գյումրու բժշկական կենտրոնի տնօրեն Արմեն Իսահակյանը, կապ հաստատելով «Էրեբունի» բժշկական կենտրոնի հետ, ճշտեց, որ նրան այս պահին վիրահատում են:
Նշենք, որ Գագիկ Ղուկասյանը ստացել է գանգի ոսկրերի բազմաբեկորային ներմղված կոտրվածք՝ ներուղեղային արյունազեղմամբ, ուղեղի սալջարդով: Սմբատ Ղազարյանը՝ Կնյազ ու Գագիկ Ղազարյանների հայրը, հետույքի շրջանում ծագած-կտրած վնասվածք է ստացել, 35-ամյա Վլադիմիր Հակոբյանը ձախ գոտկային հատվածում թափանցող ծագած -կտրած վնասվածք , ինչպես նաև վնասվածք ձախ ազդրի շրջանում: Համլետ Գևորգյանը, քերծվածքներ է ստացել ճակատի հատվածում ու այսօր դուրս է գրվել հիվանդանոցից:
Կարդացեք նաև
Հիշեցնենք, որ կրակոցները հնչել էին երեկ ուշ ժամի Գյումրու Արցախ թաղամասի «Պեգաս» խանութի մոտ, միմյանց հետ հաշվեհարդար տեսնողները եղել են Ղազարյաններն ու Արցախ թաղամասի բնակիչ Գագիկ Ղուկասյանը՝ Կոկոլի Գագոն՝ իր որդիներով: 1980 թվականի Ջանոյան Գագիկ առավոտյան 6-ին է ներկայացել գանգուղեղային վնասվածք դեմքի փափուկ հյուսվածքների սալջարդ;
Շիրակի մարզային քննչական վարչության վարույթում հարուցվել է քրեական գործ` երկու եւ ավելի անձանց նկատմամբ սպանության փորձի, զինված խուլիգանության, ապօրինի զենք-ռազմամթերք ձեռք բերելու և պահելու համար` ՀՀ քրեական օրենսգրքի 34-104-րդ հոդվածի 2-րդ մասի 1-ին կետով, 258-րդ հոդվածի 4-րդ մասով և 235-րդ հոդվածի 1-ին մասով:
Նունե ԱՐԵՎՇԱՏՅԱՆ
