«Աղտոտված շրջակա միջավայրի եւ սոցիալ-տնտեսական վիճակի զոհերն առաջին հերթին կանայք են»,-այսօր «ԷկոԼուր» մամուլի ակումբում այսպիսի կարծիք հայտնեցին բնապահպանները: Մարտի 8-ի` կանանց տոնի նախօրյակին, բնապահպանները կոչ արեցին նվազեցնել կանանց սպառնացող ռիսկերը, քանի որ նրանք իրենց մեջ կուտակված աղտոտիչ նյութերը փոխանցում են ապագա սերունդներին:
«Հայ կանայք հանուն առողջության եւ առողջ շրջակա միջավայրի» հ/կ-ի փորձագետ Քնարիկ Գրիգորյանի խոսքերով, երբ թունավոր նյութերը ներմուծվում են օրգանիզմ` շնչառական, մաշկի կամ մարսողական համակարգի միջոցով, կարող են ազդել պտղի զարգացման վրա` առաջ բերելով վիժումներ, հղիության ընդհատում, բնածին արատներ, որոնք կարող են ի հայտ գալ տարիներ հետո:
Կազմակերպությունը ուսումնասիրել է շրջակա միջավայրը, թե որքանով է աղտոտված սնդիկով եւ թունաքիմիկատներով: Ըստ փորձագետի, հետազոտությունները ցույց են տվել, որ 100 ներկրված կոսմետիկ նյութերում առկա է սնդիկ: Մինչդեռ առողջապահության նախարարության 1109 հրամանի համաձայն, միայն հեղուկ օճառների բաղադրությունում պետք է լինի ծանր մետաղներ, այն էլ` 0, 2 հազարերորդական տոկոս. «Բայց ի զարմանս ինձ հեղուկ օճառներում չէր հայտնաբերվել, հայտնաբերվել էր սպիտակեցնող կրեմներում»:
Ըստ տիկին Գրիգորյանի, 100 նմուշից միայն 17-ում չէին պարունակվում ծանր մետաղներ. «Հատկապես բժշկական միջոցներում, հնացած ճնշման չափման գործիքներում, սովորական շիկացման լամպերում են լինում սնդիկ եւ այլն: Հետազոտությունները ցույց են տվել, որ նկուղային հարկերում մարդիկ կուտակում են այդ իրերը եւ հետագայում ունենում գանգատներ` գլխացավեր, գլխապտույտներ, մարմնի դող, ցավեր ստամոքսի շրջանում եւ այլն:
Կարդացեք նաև
Մասնագետն անդրադառնալով թունաքիմիկատներին, ասաց, որ դրանց օգտագործումը եւս մի շարք խնդիրներ է առաջացնում: Ըստ նրա, ամեն տարի զարգացող երկրներում գյուղատնտեսությունում ներգրավված աշխատողներից 3 միլիոնը այս կամ այն արտահայտության հիվանդություններ կամ ախտանիշեր ունի. «3 միլիոնից 18 հազարը մահանում է: Այսինքն` սա այնքան էլ անվնաս ոլորտ չէ»:
Բնապահպանների վստահեցմամբ, եթե այդ նյութերը փոքր քանակներով ներկրվում են մարդու օրգանիզմ, կարող են առաջացնել նաեւ քաղցկեղ, սրտանոթային համակարգի, նյարդային, հոգեկան խանգարումների հիվանդություններ:
Լուսինե ԲՈՒԴԱՂՅԱՆ
