«Զարմանալի չէր, որ անգամ բերձորյան ահաբեկչությունից հետո ռեժիմը չի դադարում իր դեմքը ցույց տվող գործողություններ կատարել եւ աշխատում է ամեն կերպ խափանել մեր քայլերը»,- մարտի 6-ին Հիմնադիր խորհրդարանում լրագրողների հետ հանդիպման ընթացքում ասաց Հիմնադիր խորհրդարանի անդամ Վարուժան Ավետիսյանը:
Նա նշեց, որ իրենք պատրաստվում են վաղը՝ մարտի 7-ին, ավտոերթ կազմակերպել դեպի Գյումրի, որի ընթացքում գյումրեցիները հանդիպում կունենան շարժման առաջնորդ Ժիրայր Սեֆիլյանի հետ: Սակայն, այս անգամ էլ ավտոերթը եւ հանդիպումը խոչընդոտելու քայլեր են ձեռնարկվել. «Այդ քայլերը ձեռնարկվում են մեր նկատմամբ հալածանքներ իրականացնելու ավելի մեծ ծրագրի համատեքստում: Ռեժիմի քայլերից մեզ համար արդեն ակնհայտ է դառնում, որ հրահանգ է իջեցվել բոլոր հնարավոր ուժային մարմիններին, որպեսզի Հիմնադիր խորհրդարանի պատգամավորների, նաեւ ակտիվ աջակիցների նկատմամբ փորձեն հնարավորինս ճնշելու միջոցներ գտնել եւ այդպիսով կարողանան նրանց վրա ազդել»:
Նրա խոսքերով՝ հանկարծ հիշել են, որ իր կինը երկու տարի առաջ 100 հազար դրամ տույժի է ենթարկվել, որը գործատուի անփութության հետեւանքով իր աշխատավարձից չի պահվել, հիշել են, որ տարիներ առաջ Հիմնադիր խորհրդարանի նախագահի տեղակալ Հայկ Գրիգորյանը եղել է ինչ-որ ընկերության տնօրեն եւ այդ ընկերությունը չմարած պարտավորություններ ունի: Նա հավելեց, որ հետեւել են Հիմնադիր խորհրդարանի անդամ Հասմիկ Էվոյանին. «Փաստորեն, ամբողջ վարչական եւ քրեական ռեսուրսը ռեժիմը գործադրում է իր այդ նպատակին հասնելու համար: Մենք նաեւ քրեական հեղինակություններից հստակ հաղորդագրություններ ենք ստացել՝ մի՛ այցելեք Գյումրի, դա ճիշտ չէ, հակառակ դեպքում՝ սպառնալիքներ են հնչում մեր եւ երթի հետ կապված»:
Վարուժան Ավետիսյանի խոսքերով՝ կատարվածը ծրագրի երեւացող մասն է եւ իրենք չեն բացառում, որ եթե ոչ բերձորյան ահաբեկչության ձեւերով, ապա ինչ-որ սադրանքներ են նախապատրաստում: Նա հավաստիացրեց, որ շարժումը հաստատակամ է եւ սադրանքները իրենց չեն կարող հետ պահել ազգային ազատագրական պայքարի իրենց ծրագրից:
Կարդացեք նաև
Aravot.am-ի հարցին, թե ավտոերթին մասնակցելո՞ւ են շարժման անդամների կանայք եւ երեխաները, նա պատասխանեց. «Մենք ինչ ձեւաչափով աշխատել ենք, շարունակելու ենք այդպես աշխատել: Առհասարակ, մենք պետք է հասկանանք, որ այս բնույթի պայքարի մեջ մտած մարդը պետք է օրինակ ծառայի եւ ցույց տա, որ ինքը պատրաստ է զոհողությունների գնալ ընդհանուրի համար, որպեսզի հնարավոր լինի նաեւ կազմակերպել, հավատ առաջացնել եւ գործի դնել ուժերը: Մենք պարտավոր ենք օրինակ ծառայել, այլ կերպ չի կարելի: Բացի դա՝ մեր երկիրն է, մեր տունն է, որտեղ ուզենք կգնանք, ինչպես ուզենք կգնանք, այլ բան է, որ հանցավոր ռեժիմը կարող է դրա դեմ քայլեր ձեռնարկել: Եթե այդպես մտածենք՝ մեր ընտանիքի անդամները ամեն օր էլ վտանգի տակ են եւ որեւէ ձեւով որեւէ մեկի անվտանգությունը երաշխավորված չէ»:
Ամի ՉԻՉԱԿՅԱՆ
