Երեկ Կարսոն քաղաքի խորհուրդը միաձայն մերժել է քաղաքի Միջազգային քանդակագործության այգում Հայոց ցեղասպանության կազմակերպիչներից մեկի՝ Մուսթաֆա Քեմալ Աթաթուրքի հուշարձանի տեղադրման առաջարկը:
ԱՄՆ հայ դատի հանձնախմբի տեղեկացմամբ՝ 4-ը 0-ի դիմաց քվեարկությունը եղել է այն բանից հետո, երբ համայնքային կազմակերպությունները, ղեկավարները, ակտիվիստները եւ շահագրգիռ համայնքների ներկայացուցիչները շրջապատեցին Կարսոն քաղաքի դահլիճը, որպեսզի իրենց խոսքը ասեն հանրային քննարկումների ժամանակ: 298 անդամ դեմ էին արձանին, իսկ 101-ը կողմ: Սակայն երկու կողմից էլ 6-ական անդամների հնարավորություն տվեցին մեկնաբանություններ անել:
Մինչեւ երեկվա քվեարկությունը, մի քանի շաբաթների ընթացքում ԱՄՆ հայ դատի հանձնախումբը, Հայ հեղափոխական դաշնակցությունը, Հայկական երիտասարդական ֆեդերացիան, Ամերիկյան հելլենական խորհուրդը, հարեւան քաղաքներից ընտրված պաշտոնյաները եւ Հարավային Բեյ համայնքի մտահոգ քաղաքացիները Կարսոն քաղաքի խորհրդի անդամներին, որոնք արդեն Լոս Անջելեսի թուրք-ամերիկյան ասոցիացիայի լոբբինգի տակ էին, համոզում էին, որ Աթաթուրքի արձանի տեղադրումը հանրային վայրերում, վատ առաջարկություն է:
ԱՄՆ հայ դատի հանձնախմբի գործադիր տնօրեն Էլեն Ասատրյանն այս առնչությամբ ասել է. «Մենք շնորհակալություն ենք հայտնում համայնքային կազմակերպություններին իրենց եռանդուն պայքարի եւ ճշմարտությունը կրկին պաշտպանելու համար, որը թուրք լոբբիստները անամոթաբար եւ ապարդյուն, ինչպես տեսանք այսօր, փորձում էին թաղել կոռումպացված ֆինանսավորման եւ անտրամաբանական սխեմաների տակ»:
Կարդացեք նաև
Էլեն Ասատրյանը նաեւ ողջունել է քաղաքապետ Ջիմ Դիարին, ժամանակավոր պաշտոնակատար Էլիտա Սանտարինային եւ խորհրդի անդամների Լուլա Դավիս-Հոմսին ու Ալբերտ Ռոբելսին համայնքային կազմակերպությունների եւ գործընկերների ապացույցները եւ մեկնաբանությունները ուսումնասիրելու եւ այդ օրակարգի դեմ քվեարկելու համար:
Պատրաստեց Աշոտ ԻՍՐԱԵԼՅԱՆԸ
